AFISA MIFUGO WA MANISPAA YA SINGIDA AELEZA UMUHIMU WA UFUGAJI BORA

Posted on: August 5th, 2024

Maonesho ya Nanenane yanayoendelea katika viwanja vya Nzuguni, Dodoma, yamekuwa fursa adhimu kwa wakulima na wafugaji kupata maarifa mapya na kubadilishana uzoefu. Miongoni mwa washiriki wa maonesho haya ni Halmashauri ya Manispaa ya Singida, ambapo Afisa Mifugo wake, Hagai Zakaria, ameonekana akiwapa elimu ya kina wageni waliotembelea banda lao.

Zakaria, akiwa kwenye Banda la Mifugo la Halmashauri ya Manispaa ya Singida, alitoa maelezo kuhusu aina ya ng'ombe waliopo katika banda hilo. Aliwafahamisha wakulima na wafugaji kuhusu sifa za ng'ombe hao, akisisitiza umuhimu wa ufugaji bora na wenye tija kwa lengo la kuongeza uzalishaji na kipato.

“Ng'ombe hawa ni wa aina bora, wana uwezo wa kutoa maziwa mengi na wanakua haraka, jambo linalofanya waweze kukidhi mahitaji ya soko la ndani na la nje,” alisema Zakaria huku akionyesha mifano ya mbinu za kisasa za ufugaji. Aliendelea kueleza jinsi ya kuboresha afya ya mifugo, ikiwemo chanjo na lishe bora, ili kuzuia magonjwa na kuongeza uzalishaji.

Afisa huyo pia alitumia nafasi hiyo kuhamasisha wakulima kuzingatia ushauri wa maafisa ugani na kutumia teknolojia za kisasa katika ufugaji. “Ufugaji wa kisasa ni njia bora ya kujihakikishia kipato cha uhakika na cha kudumu. Tunawashauri wafugaji wawe na nidhamu ya kufuata ushauri wa kitaalamu ili kuweza kuleta mabadiliko chanya katika uzalishaji wao,” aliongeza.

Banda la Halmashauri ya Manispaa ya Singida limeendelea kuvutia lwatu wengi kutokana na elimu wanayopata kuhusu mbinu bora za ufugaji na mifugo ya kisasa.