ASILIMIA 77 YA WANAFUNZI WA KIDATO CHA KWANZA WAJIUNGA NA SHULE KATIKA MANISPAA YA SINGIDA

Posted on: January 27th, 2023

JUMLA ya wanafunzi 3,397 wamefanikiwa kuripoti katika shule mbalimbali za Sekondari katika Manispaa ya Singida hadi kufikia  27 Januari mwaka huu, sawa na asilimia 77 kati ya 4,558 waliotarajiwa kujiunga na kidato cha kwanza mwaka huu.

Hayo yamebainishwa na Kaimu afisa elimu wa Sekondari Manispaa hiyo Aminieli Mfinanga, wakati akitoa taarifa ya hali ya uripoti wanafunzi wa kidato cha kwanza 2023 katika shule mbalimbali walizopangwa katika Manispaa ya Singida. 

Hata hivyo Mfinanga alisema kuwa, hadi kufikia sasa, wanafunzi 1,048 bado hawajaripoti kwenye shule walizopangiwa, na idara ya elimu Sekondari inafanya jitihada mbalimbali ili kuhakikisha wote waliofaulu, wanajiunga na kidato cha kwanza 2023.

Aidha alisema kuwa jumla wanafunzi 113, waliofaulu na kupangiwa shule mbalimbali za kata, wamejiunga na shule binafsi, kwa ajili ya kuendelea na masomo ya kidato cha kwanza.

Alisema kuwa, katika kuhakikisha wanafunzi waliofaulu lakini bado hawajajiunga na masomo ya sekondari, Manispaa imeweka mikakati mbalimbali ikiwa ni  jitihada kuhakikisha wanaendelea na masomo.

Alifafanua kuwa, baadhi ya mikakati hiyo ni, watendaji wote wa kata na waratibu elimu Kata, wanawafikia wazazi na walezi wa watoto waliofaulu, ili kuwaelekeza umuhimu / ulazima  wa kuwapeleka watoto shule  na pale inapobidi kuwachukulia hatua kali za kisheria.

Kaimu Afisaelimu huyo wa Sekondari aliitaja njia nyingine kuwa ni wakuu wa shule kuhakikisha wanendelea kuwasiliana na wazazi na walezi ambao watoto wao hawajaripoti, ili waweze kuwapeleka watoto wao shuleni kwa ajili ya kuanza masomo ya kidato cha kwanza.

Mfinanga alitoa wito kwa watoto wasiokuwa na sare, kuhakikisha wanahudhuria shuleni na wazazi wapewe fursa ya kutafuta mahitaji kwa watoto wao, wakati wanafunzi wakiendelea na masomo.

BOFYA HAPA KUONA MWENENDO WA URIPOTI KIDATO CHA KWANZA 2023