DC GONDWE AENDELEA NA KASI YA KUSIKILIZA KERO ZA WANANCHI MANISPAA YA SINGIDA

Posted on: April 18th, 2024

Mkuu wa  wilaya ya Singida, Godwin Gondwe, amewataka wananchi wa halmashauri ya Manispaa ya Singida kuitumia mahakama, ili kupata haki zao, ikiwemo migogoro ya ardhi, ambayo tayari mkondo wa sheria ilishahukua hatua.

Gondwe ametoa rai hiyo, leo Aprili18,2024, wakati akitatua mgogoro wa ardhi kwa wakazi wa Kitongoji cha Unyinga, kilichopo Kata ya Mandewa, Manispaa ya Singida, ikiwa ni siku ya pili kwa ratiba yake, aliyojipangia kwa ajili ya kusikila kero za Wananchi.

“Niwaomba tuwe tunaheshimu maamuzi ya mahakama, kwa lengo la kumaliza migogoro kama hii isiyo na faida kwa jamii …yetu, mgogoro kama huu ambao tayari ulishafikishwa mahakamani na kutolewa uamuzi, unapaswa kutatuliwa kwa njia hiyo hiyo ya mahakama…,”amesisitiza Gondwe.

Aidha amewataka wataalam wa Manispaa ya Mingida, kutoa elimu ya kutosha kwa wananchi wanaokabiliwa na migogoro mbalimbali, ikiwemo ile ya ardhi, ili kuepuka kuyumbishwa, hata kupoteza haki zao, kutokana na kukosa elimu ya kutosha inayohusu masuala ya sheria.

“…nawaomba wataalamu wa Manispaa, nendeni mkawape wananchi elimu ya kutosha, ili wapate uelewa zaidi juu ya haki zao…kinachohitajika hapa ni elimu tu, hii inaweza kupunguza migogoro, ikiwemo ile ya masuala ya ardhi” amesema Gondwe.

Gondwe amesema wananchi wengi wameonekana kudhulumiwa na kupoteza haki zao kutokana na  kukosa elimu na sehemu sahihi ya kutatua  changamoto husika, hata kwa suala dogo tu, hali inayopunguza ufanisi kwao, pia kukosa Imani na serikali yao.

Katika mkutano mwingine alioufanya Mkuu huyo wa Wilaya, katika viwanja vya stendi ya zamani, katika kata ya Majengo mjini Singida, aliweza kusikiliza kero mbalimbali zilizohusisha mashauri ya ndoa, mikopo umiza, mundominu ya huduma za kijamii, ikiwemo barabara na tozo za maegesho ya magari na kuzitolea maelekezo.

Picha za Matukio mbalimbali ya mikutano ya kusikiliza kero za wananchi iliyofanywa na Mkuu wa Wilaya ya Singida, Godwin Gondwe:

Mkuu wa wilaya ya Singida Godwin Godwe akisikiliza kero za wananchi eneo la Stendi ya Zamani kata ya Majengo

DC Gondwe akizungumza na wananchi wa Kata ya Majengo

Mkuu wa wilaya ya Singida  Godwin Gondweakisikiliza kero ya ardhi inayowakabili wananchi wa Kitongoji cha Unyinga, katika Kata ya Mandewa

Baadhi ya wananchi wa Kitongoji cha Unyinga wakimsikiliza Mkuu wa Wilaya ya Singida Godwin Gondwe wakati akisikiliza kero za wananchi