DC GONDWE AFUNGUA MAFUNZO YA MADIWANI WILAYA YA SINGIDA

Posted on: January 13th, 2026

Mkuu wa Wilaya ya Singida, Mhe .Godwin Gondwe, kwa niaba ya Mkuu wa Mkoa wa Singida, amefungua mafunzo elekezi ya siku tatu kwa Waheshimiwa Madiwani wa Halmashauri ya Manispaa ya Singida na Singida DC, yenye lengo la kuwaimarisha katika utekelezaji wa majukumu yao ya uongozi kwa kipindi cha miaka mitano ya 2025–2030.

Mafunzo hayo yameanza leo Januari 13, 2026, katika ukumbi wa Ofisi ya Mkuu wa Mkoa wa Singida, yakihusisha madiwani wapya waliochaguliwa katika uchaguzi wa Oktoba 29, 2026, ambao wanatarajiwa kuongoza kata zao kwa kipindi cha miaka mitano.

Akizungumza wakati wa ufunguzi wa mafunzo hayo, Gondwe aliwataka madiwani hao kuyatumia mafunzo hayo kama msingi wa utendaji wao, akisisitiza umuhimu wa kuzingatia sheria, taratibu na miongozo katika kusimamia maendeleo ya wananchi waliowachagua.

“Madiwani ni kiungo muhimu kati ya Serikali na wananchi. Ni lazima mjenge uelewa wa pamoja na watendaji wa halmashauri ili kuhakikisha mipango ya maendeleo inatekelezwa kwa ufanisi na kwa maslahi mapana ya wananchi,” alisema Gondwe.

Aliongeza kuwa mafunzo hayo yamelenga kuwajengea uwezo madiwani katika maeneo mbalimbali ikiwemo majukumu ya baraza la madiwani, usimamizi wa rasilimali za umma, maadili ya uongozi, pamoja na ufuatiliaji na tathmini ya miradi ya maendeleo.

Kwa upande wao, baadhi ya madiwani walioshiriki mafunzo hayo walisema mafunzo hayo ni muhimu hasa kwa madiwani wapya, kwani yatawasaidia kuelewa kwa kina nafasi yao katika uongozi wa Serikali za Mitaa na namna bora ya kuwatumikia wananchi.

Mafunzo hayo yanatarajiwa kukamilika baada ya siku tatu, huku viongozi wa mkoa wakieleza matumaini kuwa yatasaidia kuongeza uwajibikaji, uwazi na kasi ya utekelezaji wa miradi ya maendeleo katika Halmashauri za Manispaa ya Singida na Singida DC.