DC GONDWE APONGEZA UFAULU ,ALISISITIZA UMALIZIAJI MIRADI VIPORO

Posted on: January 24th, 2025

Mkuu wa Wilaya ya Singida, Mhe. Godwin Gondwe, ameipongeza Wilaya ya Singida, hususan Halmashauri ya Manispaa ya Singida, kwa mafanikio yaliyopatikana katika matokeo ya Kidato cha Nne, ambapo Manispaa ya Singida imefanikiwa kupata ufaulu wa asilimia 91.7.

Mhe. Gondwe amesisitiza pia umuhimu wa kumalizia miradi ya viporo kwa ubora ili kuendelea kuleta maendeleo katika eneo hilo hii baada ya kupitisha mpango wa rasimu ya bajeti 2025/26.

Mhe. Gondwe aliyasema hayo Januari 24, 2025, wakati akizungumza katika Kikao cha Kamati ya Ushauri ya Wilaya (DCC) kilichojadili utekelezaji wa mpango wa bajeti wa mwaka 2023-2024 na mpango wa bajeti wa mwaka wa fedha 2025-2026.

Kikao hicho kilifanyika katika Ukumbi wa Maktaba ya Mwenge Sekondari, na kilihusisha Halmashauri mbili za Wilaya ya Singida, yaani Halmashauri ya Manispaa ya Singida na Halmashauri ya Wilaya ya Singida (Singida DC).

Mhe. Gondwe alieleza kwamba mafanikio hayo ya ufaulu ni matokeo ya kazi nzuri iliyofanywa na maafisa elimu wa wilaya hiyo. Aliongeza kuwa, ingawa ufaulu wa Manispaa ya Singida umefikia asilimia 91.7, ni muhimu kuchukulia hatua za kuhakikisha kuwa kiwango hicho kinaendelea kuongezeka.

“Pongezi kwa maafisa elimu wa Wilaya ya Singida wamefanya kazi kubwa sana, tutatangaza rasmi, ila kwa Manispaa najua wana ufaulu wa asilimia 91.7. Huu si jambo dogo, nakumbuka mwaka jana ilikuwa asilimia 84.”

Aidha, Mhe. Gondwe alisisitiza kwamba mafanikio haya yanatokana na juhudi za Rais wa Jamhuri ya Muungano wa Tanzania, Mhe. Samia Suluhu Hassan, ambaye ameongeza mazingira bora ya kujifunzia kwa wanafunzi. Aliongeza kuwa ni muhimu kumaliza miradi ya viporo ili kuhakikisha kwamba miundombinu ya elimu inaendelea kuboreshwa kwa ubora unaohitajika.

Hata hivyo, licha ya mafanikio hayo, Mhe. Gondwe alikumbusha halmashauri zote mbili kuhakikisha kwamba suala la lishe linaendelea kutiliwa mkazo katika bajeti yao. Alieleza kuwa ni muhimu kuhakikisha kwamba bajeti inaendelea kubaini na kuzingatia masuala muhimu kama lishe, ili kuepuka changamoto zinazoweza kujitokeza.