DC GONDWE APONGEZA WALIMU KWA MAFANIKIO, AHAMASISHA KUONGEZA UFAULU SEKONDARI

Posted on: November 23rd, 2024

Mkuu wa Wilaya ya Singida, Mhe. Godwin Gondwe, amewapongeza walimu wa wilaya hiyo kwa juhudi kubwa wanazozifanya katika kuboresha elimu, huku akisisitiza lengo la kuongeza ufaulu na kuondoa daraja la nne na la sifuri katika matokeo ya shule za sekondari.

Mhe. Gondwe alitoa pongezi hizo leo, Novemba 23, 2024,katika Bonanza la Mwalimu lililofanyika katika Uwanja wa Bombadia, Manispaa ya Singida.

Bonanza hilo lililoshirikisha walimu wa wilaya nzima, lilikuwa na lengo la kutambua na kuwazawadia walimu kwa kazi nzuri wanazozifanya, ikiwa ni sehemu ya kuhamasisha mafanikio zaidi katika sekta ya elimu.

Mhe. Gondwe alieleza kuwa wilaya ya Singida imeendelea kufanya vizuri katika matokeo ya elimu, ambapo hivi karibuni wilaya hiyo ilishika nafasi ya pili, na Manispaa ya Singida kushika nafasi ya tatu.

"Nawapongeza walimu kwa kazi nzuri mnayoifanya. Mfano hivi karibuni matokeo yametoka kwa wilaya ya Singida, Singida imeshika nafasi ya pili na Manispaa ya tatu, lakini baada ya hili bonanza ninaamini kutakuwa na mabadiliko," alisema Mhe. Gondwe.

Aidha, Mhe. Gondwe alisisitiza kuwa malengo ya mwaka ujao ni kuondoa kabisa daraja la nne na la sifuri katika matokeo ya shule za sekondari.

"Kufika mwakani, tunataka kupata matokeo bora na kufuta yale madaraja ya chini – lile daraja la nne na sifuri. Hii inawezekana kwa kuhakikisha wanafunzi wote wanapata chakula shuleni kwa asilimia 100, na juhudi zinaendelea katika hilo,".

Bonanza la Mwalimu lilikuwa pia ni fursa ya kutunukiwa walimu vyeti na zawadi kwa matokeo bora waliyoyapata katika kazi zao.

Mhe. Gondwe alieleza matumaini yake kwamba tukio hilo litakuwa chachu ya mafanikio zaidi katika shule za wilaya ya Singida, na kwamba walimu wataendelea kuongeza juhudi katika kuboresha elimu.