DC GONDWE AZINDUA UGAWAJI WA VITAMBULISHO VYA KIDIGITALI

Posted on: December 5th, 2024

Mkuu wa Wilaya ya Singida, Mhe.Godwin Gondwe, amemuwakilisha Mkuu wa Mkoa wa Singida, Mhe.Halima Dendego, katika uzinduzi wa zoezi la ugawaji wa vitambulisho vya kidijitali kwa wajasiriamali wadogo mkoani Singida.

Uzinduzi huo ulifanyika jana, Desemba 5, 2024 katika Ofisi ya Mkuu wa Wilaya ya Singida, Manispaa ya Singida na kuhudhuriwa na viongozi mbalimbali, akiwemo Katibu Tawala Msaidizi wa Sehemu ya Viwanda na Biashara, pamoja na maafisa maendeleo ya jamii kutoka ngazi za Mkoa na halmashauri, ambao ni waratibu wa dawati la wafanyabiashara ndogo ndogo.

Akizungumza wakati wa hafla hiyo, DC Gondwe alisema kuwa ni wakati muafaka kwa wajasiriamali kutumia fursa zinazojitokeza kupitia vitambulisho hivyo, na alitoa agizo kwa waratibu wa zoezi hilo katika wilaya zote kuongeza kasi ya kuandikisha wajasiriamali ili wengi zaidi wanufaike.

“Shughuli ya uzinduzi na ugawaji wa vitambulisho vya kidijitali kwa ajili ya Wafanyabiashara ndogondogo katika Mkoa wa Singida umetokana na changamoto ya muda mrefu ya kutaka kuwatambua wafanyabiashara ndogondogo nchini kwa idadi yao na umuhimu wa kuweka utaratibu mzuri wa kuwaratibu ili waweze kukua katika shughuli zao za kiuchumi na kijamii. Lengo letu ni kuwainua wafanyabiashara hao kiuchumi na kijamii pamoja na kuhakikisha changamoto zao zinapatiwa ufumbuzi na wataalam kwa wakati,” alisema Gondwe.

Awali, Katibu Tawala Msaidizi wa Sehemu ya Viwanda na Biashara, Bi. Donatila Vedasto, alielezea makundi mbalimbali ya wafanyabiashara ndogo ndogo nchini. Alisema, “Wafanyabiashara ndogondogo wanajumuisha machinga, mama na baba lishe, madereva wa bodaboda na bajaji, wasusi, vinyozi, wakulima wa bustani ndogo na wauzaji wa vyakula kama matunda na mbogamboga. Sekta hii inachangia kwa kiwango kikubwa kutoa ajira kwa vijana wanaohitimu katika ngazi mbalimbali za elimu na taaluma hapa nchini.”

Hadi sasa, takribani wajasiriamali 894 wameshasajiliwa na kupata vitambulisho hivyo katika Mkoa wa Singida.