DC Gondwe: "Palipo na Mwanamke, Pana Uhai"

Posted on: March 4th, 2025

• 
  

  
  

  
  

  
  

  
  
  Mkuu wa Wilaya ya Singida, Mhe. Godwin Gondwe, amesema kuwa mahali popote palipo na mwanamke, pana uhai, kwani mwanamke ni mama na mlezi kwa wakati mmoja.
  
  Gondwe alitoa kauli hiyo leo Machi 4, 2025, wakati wa maadhimisho ya Siku ya Wanawake, yaliyofanyika katika Shule ya Msingi Tumaini Viziwai shule maalum kwa wanafunzi wenye ulemavu wa kusikia, iliyopo katika Kata ya Misuna.
  
  Mhe. Gondwe aliwataka wanawake kutumia nafasi zao vizuri kama mama na walezi wa jamii, kwani ni wao wanaohakikisha jamii inakuwa na maendeleo. "Kwa niaba ya wanaume wote, ninapenda kuwashukuru wanawake wote kwa kutumia nafasi zao vizuri kama mama na walezi katika jamii. Palipo na mwanamke hakuna linaloharibika," alisema Gondwe.
  
  Aidha, Mhe. Gondwe alitumia fursa hiyo kumpongeza Rais wa Jamhuri ya Muungano wa Tanzania, Dkt. Samia Suluhu Hassan, kwa kujali jamii na kuleta maendeleo kwa wananchi wake katika nyanja mbalimbali ikiwemo afya, elimu, maji, na umeme. "Rais wetu, Dkt. Samia Suluhu Hassan, amekuwa mfano mzuri wa uongozi. Kama mama, mlezi, na kiongozi wa taifa, ameleta mabadiliko makubwa kwa wananchi wake," alisisitiza.
  
  Katika kuadhimisha Siku ya Wanawake, Manispaa ya Singida imeendesha wiki ya maadhimisho katika kata zote, na leo imefikia kilele chake katika Kata ya Misuna. Wanawake wa kata hiyo walishirikiana na watumishi wa Manispaa ya Singida, pamoja na wadau wa maendeleo kutoka Kiwanda cha Kuzalisha Mafuta cha Kilimo Kwanza, kutoa misaada mbalimbali kwa wanafunzi wenye ulemavu wa kusikia katika Shule ya Tumaini Viziwi.
  
  Misaada iliyotolewa ni pamoja na magodoro 40 na jozi 94 za kandambili, ikiwa ni sehemu ya juhudi za kusaidia watoto wenye ulemavu wa kusikia ili waweze kupata elimu bora na mazingira bora ya kujifunza.
  
  Shule ya Tumaini Viziwi inajumuisha jumla ya wanafunzi 98, wakiwemo wavulana 57 na wasichana 41. Shule hiyo ina walimu 8, wakiwemo wanaume 3 na wanawake 5, ambao wanaendelea kutoa huduma ya elimu kwa wanafunzi hao wenye ulemavu wa kusikia.

  
  

  11h

  
  

  
  

  See translation