DC SINGIDA AAGIZA USIMAMIZI BORA LISHE MASHULENI

Posted on: August 15th, 2024

Mwenyekiti wa Kamati ya Lishe Wilaya ya Singida, Mhe. Godwin Gondwe, ameendelea kusisitiza umuhimu wa usimamizi wa lishe katika kuhakikisha chakula kinapatikana katika shule za Wilaya ya Singida. Mhe. Gondwe alitoa maelekezo haya alipokuwa akizungumza na watumishi kutoka Halmashauri ya Manispaa ya Singida na Singida DC katika kikao kilichofanyika ofisini.

Mhe. Gondwe alisisitiza kuwa, upatikanaji wa chakula mashuleni ni muhimu sana kwa maendeleo ya watoto kitaaluma. Aliongeza kuwa, chakula bora ni sehemu muhimu ya mazingira ya kujifunzia kwa watoto na kinachangia moja kwa moja katika utendaji wao mzuri shuleni.

"Ni lazima kuhakikisha kwamba chakula kinapatikana katika shule zote za Manispaa ya Singida. Hii siyo tu suala la lishe bali pia ni hatua muhimu katika kuboresha elimu na kuhakikisha watoto wanapata maendeleo bora," alisema Mhe. Gondwe.

Mwenyekiti huyo alibainisha kuwa usimamizi wa lishe mashuleni ni suala linalopaswa kufanyiwa kazi kwa umakini mkubwa. Aliwahimiza watumishi kuhakikisha kuwa chakula kinatolewa kwa wakati, kinakuwa na ubora, na kinakuwa sehemu ya ratiba ya kila siku mashuleni. Aliongeza kuwa, hatua hizi zitasaidia kuondoa tatizo la watoto kukosa chakula, ambalo linaweza kuathiri uwezo wao wa kujifunza na kufanya vizuri katika masomo yao.

Aidha, Mhe. Gondwe alionya kuhusu umuhimu wa ufuatiliaji na tathmini ya hali ya lishe mashuleni. Alisisitiza kuwa, kila shule inatakiwa kuwa na mfumo mzuri wa kusimamia upatikanaji na usambazaji wa chakula, na kuhakikisha kwamba hatua zinachukuliwa pale ambapo matatizo yanajitokeza.

Mhe. Gondwe alisisitiza kuwa usimamizi wa lishe mashuleni ni muhimu kwa maendeleo ya watoto na kwamba ni jukumu la kila mdau kuhakikisha kuwa malengo haya yanafikiwa kwa ufanisi.