DC SINGIDA ASISITIZA UWEPO WA MKAKATI WA KUPUNGUZA VIFO VYA WATOTO WACHANGA

Posted on: March 30th, 2022

Mkuu wa wilaya ya Singida Mhandisi Paskasi Mulagiri amewataka wataalamu wa afya kuhakikisha wanaweka mikakakati mizuri  inayotekelezeka ya kupunguza vifo vya Watoto wachanga kuanzia umri 0 -  28 katika Manispaa ya Singida.

Mhandisi Mulagiri aliyasema hayo katika kikao cha robo ya tatu cha afua za lishe kilichofanyika katika ukumbi wa Halmashauri ya Manispaa ya Singida na kuhudhuriwa na wajumbe wote ikiwemo Kamati ya ulinzi na usalama ya wilaya, Wakuu wa idara, na watendaji wa Kata ambapo mkuu huyo wa wilaya ni Mwenyekiti wa kamati hiyo.

Alisema kuna kila sababu ya idara ya Afya kuweka utaratibu wa kuwafuatilia kinamama wajawazito tangu hudhurio la kwanza la kliniki mpaka hatua ya mwisho ya kujifungua ili kuweza kubaini matatizo yanayojitokeza kwa kinamama hao katika kipindi kizima cha ujauzito.

“ kwa taarifa tulizopitia leo ni wazi kuwa bado kliniki zetu hazina uwezo wa kubaini changamoto mbalimbali za ujauzito nasisitiza pawepo na utaratibu wa kuwafuatilia wajawazito tangu hudhurio la kwanza la kliniki hadi anapoenda kujifungua” alisema Mkuu wa Wilaya.

Aidha aliwaasa kinamama wajawazito na familia zao kwa ujumla kuwa wazi  panapotokea changamoto zozote kutoka na na hali ya ujauzito ili kuweza kupatiwa msaada wa haraka kabla matatizo makubwa hayajatokea.

Mratibu wa huduma za mama na Mtoto Bi. Joyce Muyenjwa alisema sababu ni nyingi zinazopelekea  vifo vya watoto wachanga kabla ya kuzaliwa au pindi wanapozaliwa  na kutaja sababu chache ikiwa ni Pamoja na ukaaji mbaya wa mtoto  tumboni unaopelekea mtoto kujifunga na kitovu kinachomuunganisha na mama , imani za kijamii ya kutumia dawa za kuchochea uchungu, na Jamii kutoona umuhimu wa kuhudhuria kliniki mapema na badala yake hufika katika vituo vya huduma baada ya kutokea changamoto.

Aidha alisema Idara ya afya imeendelea kuwekeza katika kutoa elimu kwa mama mjamzito katika vituo vya kutolea huduma pindi wanapofika kliniki lakini pia kwa jamii nzima juu ya umuhimu wa mke na mume kuhudhuria pamoja kliniki ili kujua kwa pamoja maendeleo ya afya ya mama na mtoto aliyetumboni, pia umuhimu wa kumpeleka mtoto kliniki mara baada ya kuzaliwa mpaka atakapotimiza umri wa miaka 5.

Naye Bi. Aneth Kanywa alitoa wito kwa jamii kuacha kuwaficha ndani watoto wenye utapiamlo  mkali hivyo kushindwa kutolewa taarifa na kupatiwa huduma stahiki kwa  haraka.

AlisemaJumla ya Watoto waliobainika na kutolewa taarifa ni 15 ambao wanapatiwa huduma ya chakula dawa na kwamba kwa sasa wanaendelea vizuri.

Amesema elimu inaendelea kutolewa na watoa huduma ngazi za msingi ili Jamii iweze kuwabaini Watoto hao na kuweza kuwafikisha katika kituo cha huduma na kupatiwa huduma kwa haraka.

“Watoto wengi wenye utapiamlo wamefichwa majumbani ila tunaendelea kuielimisha Jamii ili kuweza kuwabaini na kuwatolea taarifa ili waweze kupata huduma stahiki”, alisema Bi. Aneth.

Mwenyekiti wa Kamati ya Lishe , Mhandisi Paskasi Mulagiri, Mkuu wa wilaya ya Singida  alihitimisha kikao kwa kuwataka waratibu wa Lishe, mama na mtoto na Mfuko wa Afya ya Jamii kutimiza majukumu yao  kwa umakini ili kuleta ufanisi na kwamba hatomvumilia yeyote atakayezembea katika utekelezaji wa majukumu yake.

Alisema Kamati lishe ni muhimu katika mustakabali mzima wa afya ya jamii kwani lishe ni muhimu kutokana na kwamba inagusa maisha ya kila mwananchi moja kwa moja hivyo kuwataka wasimamizi na watumishi wa sekta ya afya kuwa wazalendo na wenye dhamira ya haki kwa kuwatendea haki wananchi.