DC SINGIDA ATOA WIKI MBILI KWA WAZAZI KUPELEKA WATOTO SHULE

Posted on: February 7th, 2024

SERIKALI Wilayani Singida imetoa muda wa wiki mbili kwa watoto wote wa sekondari, msingi na awali kuripoti shuleni na baada ya hapo itachukua hatua kali kwa wazazi ambao watoto wao hawajaripoti shuleni na wengine kuandikishwa katika Halmashauri ya Manispaa ya Singida.

Hayo yamesemwa na Mkuu wa Wilaya ya Singida, Mhandisi Paskas Muragili katika Mkutano wa Baraza la Madiwani la Robo ya Pili mwaka wa fedha 2023/24, mkutano ambao umefanyika leo Februari 07, 2024 katika Ukumbi wa Maktaba ya Shule ya Sekondari Mwenge.

Amesema Serikali imejipanga kufanya msako maalum wa wazazi ambao watoto wao hawajaripoti shule hasa wale wa kidato cha kwanza na wale ambao wanatakiwa kuandikishwa kwa ajili ya darasa la kwanza na awali.

Mpaka sasa uandikishaji wanafunzi na wale ambao wanatakiwa kuripoti ni zaidi ya asilimia 80, lakini serikali inataka kuona zoezi hilo linakamilika kwa asilimia 100.

Muragili alisema: “Nataka kuwaagiza watendaji wote wa Kata kuhakikisha wanafanya oparesheni maalum kufuatilia watoto wote ambao hawajaripoti kidato cha kwanza pamoja na wazazi wao na hatua kisheria zichukuliwe na kwa sasa natoa wiki mbili pekee mpaka kufika mwisho wa mwezi huu wa pili nataka kuona watoto wote wawe shule na hatua zimechukuliwa.”

Mkuu wa Wilaya, kupitia mkutano huo aliwajulisha wajumbe kuwa Mkuu wa Mkoa wa Singida, Peter Serukamba ametoa agizo kufikia Aprili 30, mwaka huu, kuhakikisha kila kaya inamiliki choo bora lengo likiwa ni kuhakikisha mkoa unakuwa safi.

“Mkuu wa Mkoa ameagiza hivyo, lakini mimi naagiza kufika mwezi Machi mwaka huu, tutaanza operesheni ya kukagua kila nyumba kama inamiliki choo bora na wale ambao watakuwa tofauti watapewa muda lakini baada ya ukaguzi kama itakuwa ni tofauti basi watachukuliwa hatua.”amesisitiza Muragili

wakati huo huo Mhandisi Muragili amewataka viongozi kuanzia ngazi ya chini mpaka juu kuhakikisha wanapambana kutatua kero za wananchi wao ilikupunguza zile sitofahamu za mara kwa mara.