ELIMU YA SENSA YA WATU NA MAKAZI , YAZAA MATUNDA MANISPAA YA SINGIDA

Posted on: August 23rd, 2022

ZOEZI la Sensa ya Watu na Makazi katika Manispaa ya Singida limeendelea vizuri katika maeneo yote ya Manispaa ambapo makarani walianza kazi ya kuhesabu watu katika maeneo maalum kama nyumba za kulala wageni na vituo vya mabasi na kupata ushirikiano mzuri kutoka kwa wananchi.

Akiongea na waandishi wa habari baada ya kuhesabiwa, Mkuu wa Mkoa wa Singida, Peter Serukamba, amesema kutokana na uhamasishaji wa kutosha uliofanyika wananchi wamekuwa wakitoa ushirikiano mzuri kwa makarani wa sensa.

"Maeneo ambayo yalikuwa na changamoto kidogo kama Wilaya ya Singida vijijini, mpaka wa Mkoa wa Manyara na mpaka wa Mkoa wa Dodoma tumeongea na wananchi na wamekubali kuhesabiwa," alisema.

Mkuu wa Mkoa  ameendelea kuwasisistizia wananchi kuacha namba za simu na taarifa sahihi majumbani mwao pindi wanapotoka kwenda kwenye shughuli zao ili makarani watakapofika waweze kuwasiliana nao na hivyo kuwawezesha kuhesabiwa.

Naye  Mkuu wa Wilaya ya Singida, Mhandisi Paskas Mulagiri, ametoa wito kwa wananchi kutambua kuwa mipaka ya sensa si mipaka ya kiutawala na kwamba mipaka hii imetengwa kwa ajili ya maeneo ya sensa ambayo watu wa takwimu wanaitumia kujua idadi ya watu.

 Mhandisi Mulagiri ameyasema hayo kufuatia  changamoto ilijitokeza katika baadhi ya maeneo katika Halmashauri ya Singida ambapo wananchi waligoma kuhesabiwa kwa madai kuwa mipaka ya sensa haiendani na mipaka ya kiutawala.

Alisema kutokana na changamoto hiyo, Kamati ya Ulinzi na Usalama ilishughulikia tatizo hilo kwa kutembelea eneo husika kuzungumza na wananchi ambao wameelimishwa na kukubali kuhesabiwa.

Kaimu Mkurugenzi wa Manispaa ya Singida Jeshi Godfrey Lupembe ambaye amekuwa akitembelea maeneo mbalimbali ili kujionea hali ya uhesbabuji inavyoendelea, amesema, mwitikio wa wananchi katika maeneo ypte aliyopita kata, vijiji, mitaa na vitongoji ni mzuri hali inayoonesha elimu kwa wananchi kuhusu zoezi la Sensa iliwafikia wananchi vyema.

“Zoezi la sensa ya watu na makazi limeanza saa sita na dakika moja usiku kwa makarani kupita katika nyumba za kulala wageni na vituo vya mabasi, walipewa ushirikiano mzuru” alisema Kaimu Mkurugenzi.

Jeshi amesema hadi sasa hakuna changamoto iliyojitokeza ambayo ingehatarisha utekelezaji wa zoezi la sensa ya watu na makazi na amewashukuru wananchi kwa ushiriiano na kuwataka kuendelea kujitokeza ili kupata haki ya kuhesabiwa.

 Naye Mwenyekiti wa Chama Cha Mapinduzi (CCM) Mkoa wa Singida, Alhaji Juma Killimbah, amesema wananchi watakapojitokeza kuhesabiwa watakuwa wameisaidia serikali inayoongozwa na CCM kupanga mipango yake ya maendeleo.

"Sisi CCM huwa tunatengeneza ilani ya chama kulingana na idadi ya watu kwa hiyo tunawaomba wananchi wajitokeze kuhesabiwa na kwa jinsi serikali ya Mkoa wa Singida ilivyofanya uhamasisha mkoa utafanikiwa katika zoezi hili," alisema.

Maeneo mengi ya Manispaa ya  Singida wananchi wameonekana wakiwa majumbani mwao kusubiri makarani ili kuweza kuhesabiwa sambamba na  maeneo ya biashara ambapo wafanyabiashara wameonesha ushirikiano kwa makarani hali iliyopelekea zoezi la sensa ya watu na makazi katika maeneo hayo kufanyika kwa amani na utulivu.