HALMASHAURI YA MANISPAA YA SINGIDA YAWAKARIBISHA WAHESHIMIWA MADIWANI NA WATUMISHI WA HALMASHAURI YA WILAYA YA UYUI MKOA WA TABORA KWA ZIARA YA MAFUNZO.

Posted on: December 28th, 2022

Waheshimiwa madiwani Pamoja na wataalamu mabalimbali kutoka Halmashauri ya wilaya ya Uyui mkoani Tabora wamepokelewa Manispaa ya Singida kwa lengo la kujifunza namna bora ya ukusanyaji mapato,kilimo cha alizeti na Ufugaji nyuki.

Naibu Meya wa Manispaa ya Singida Hassan Mkata,amewakaribisha wageni hao kufanya ziara yao,huku akiwataka wajisikie huru na amani kwa sababu Manispaa ya Singida ni salama na kuna mambo mengi ya kujifunza hususani katika masuala mazima ya ukusanyaji mapato, ufugaji wa nyuki na kilimo cha alizeti.

 “……Karibuni sana Manispaa ya Singida,tumefurahishwa sana na ujio wenu,tunafahamu mmekuja kujifunza naamini na sisi kuna vitu tutajifunza kutoka kwenu……….”amesema Naibu Meya

Kwa upande wa Utumishi na Utawala, Afisa Utumishi na Utawala, Kulanga Kanyanga ameleza mafanikio mbalimbali katika suala zima la utawala, ikiwa ni utoaji wa motisha kwa watumishi bora zoezi linalofanyika kila mwezi,kuwatembelea na kutatua kero za watumishi wa ngazi za chini na kuanzisha uvaaji T-shirt za Manispaa kwa watumishi  inayovaliwa kila Ijumaa.

Katika suala la mapato, Mkuu wa Kitengo cha Fedha na Uhasibu wa Manispaa Revocatus Mohabe ametaja vyanzo mbalambali vya ukusanyaji mapato ikiwa ni Pamoja na ushuru wa huduma, ushuru wa mazao,ushuru wa vituo vya magari Pamoja na maegesho na hivi ni vyanzo vikuu vya mapato kwa Manispaa ya singida na mapato haya yanasaidia katika utekelezaji wa miradi mbalimbali ya maendeleo.

Mkuu wa Idara ya Kilimo na Mifugo wa Manispaa ya Singida, Dr.Adrianus Kalekezi amesema kuwa kilimo cha alizeti kwa Manispaa kimechochewa kwa kuwa na viwanda vingi vinavyofikia 36 vikijumuisha viwanda vikubwa,vya kati na vidogo vinavyosaidia kukamua mafuta ya alizeti, na kusema kuwa Manispaa inategemea sana malighafi ya alizeti kutoka Halmashauri nyingine za mkoa wa Singida  na mikoa ya Jirani kama Iringa na Dodoma, kwani uzalishaji wa alizeti  kwa Manispaa ni mdogo.

Afisa Misitu na Maliasili wa Manispaa, Jacob Chibuga amesema kuwa Manispaa ya Singida ni moja ya Halmashauri zinazofanya vizuri katika uzalishaji wa asali nyingi,  asali hiyo imekuwa ikitumiwa na wenyeji Pamoja na wageni mbalimbali ,imekuwa ni moja ya uwekezaji mzuri na wenye faida, pia imekuwa moja ya vivutio vya utalii hasa uwepo wa mradi mkubwa wa ufugaji nyuki unaoitwa Kijiji cha nyuki  uliopo   kata ya Kisaki, wageni na wenyeji wamekuwa wakifika katika eneo hilo ili  kujifunza mengi kuhusu ufugaji wa  nyuki na uzalishaji wa asali.

 Mwenyekiti wa Halmashauri ya wilaya ya Uyui,Said Ntahonda ameishukuru Manispaa ya Singida kwa Mapokezi mazuri,na kusema wamejifunza mengi na kuahidi kwenda kuyafanyia kazi ipasavyo ili  waweze kupiga hatua Zaidi katika suala la ukusanyaji mapato,kilimo cha alizeti na ufugaji wa nyuki.