HALMASHAURI ZOTE NCHINI IGENI MFANO WA MANISPAA YA SINGIDA - MCHENGERWA

Posted on: December 13th, 2023

Halmashauri zote nchini zimetakiwa kuiga mfano wa Halmashauri ya Manispaa ya Singida ambayo imeweza kutumia vyema mapato yake ya ndani kwa kuwajali wananchi wake kupitia miradi ya maendeleo inayotekelezwa kwa makusanyo ya ndani .

Waziri Ofisi ya Rais Tawala za Mikoa na Serikali za Mitaa (TAMISEMI), Mohamed Mchengerwa (Mb), ametoa agizo hilo leo Desemba 13, 2023 katika ziara yake mkoani Singida ambapo aliweza kuzindua magari ya ufuatiliaji ya sekta ya afya pamoja na kutembelea mradi wa ujenzi wa kituo kipya cha afya kata ya Mtipa, Manispaa ya Singida kilichojengwa kwa mapato ya ndani.

Mchengerwa amepongeza utekelezaji wa mradi huo na kusema mradi huo ni matokeo ya mipango mizuri ya Manispaa ya Singida ambayo imemfikiria zaidi mwananchi ili kupunguza changamoto zinazowakabili.

Amesema kiongozi mzuri ni yule anayejali wananchi wake kwa kuweka mipango mizuri ya maendeleo yenye ubunifu inayowafikiria wananchi kutokana na changamoto mbalimbali zilizopo katika jamii

Aidha amesema katika kuunga mkono mradi huo wizara yake imetoa fedha kiasi cha Shilingi milioni 150 kwa ajili ya ununuzi wa dawa na vifaa tiba, na kutoa rai kwa uongozi wa Mkoa na Manispaa kuhakikisha kituo hicho kipya cha afya kinafunguliwa haraka ili kuanza kutoa huduma.

”Ninawapongeza sana kwa mradi huu uliozingatia mpango mzuri wa maendeleo wenye ubunifu uliowajali zaidi wananchi. Ninaagiza halmashauri zote nchini kuiga mfano huu wa Manispaa ya Singida”, amesema Waziri Mchengerwa

Jumla ya Magari 06 yalikabidhiwa kwa halmashauri 5 za Iramba, Mkalama, Halmashauri ya Wialya ya Singida, Ikungi na  Manyoniwakati gari moja likabidhiwa kwa Mganga Mkuu wa mkoa yote ni kwa ajili ya ufuatiliaji wa shughuli za afya katika Halmashauri.

Halmasauri 02 za Itigi na Manispaa ya Singida zitakabidhiwa magari yake kabla ya Desemba 31, 2023.