'HONGERA MANISPAA YA SINGIDA’

Posted on: February 28th, 2024

KAMATI ya Siasa Mkoa Singida imeipongeza Halmashauri ya Manispaa ya Singida kwa kazi nzuri na bora ambayo wamefanya hasa katika kusimamia miradi yake.

Mwenyekiti wa Chama cha Mapinduzi Mkoa wa Singida, Martha Moses Mlata amesema hayo jana wakati wa ziara yake katika Wilaya ya Singida, hususan katika Manispaa ya Singida.

Katika ziara hiyo ya kukagua miradi na utekelezaji wa Ilani ya chama, Mlata aliongozana na Kamati ya Siasa Mkoa na ile ya Wilaya ambayo inaongozwa na Bi Lucia Mwilu kuhakikisha mambo yanakwenda sawa.

Mlata alisema Manispaa wako vizuri katika kusimamia miradi na anaamini wakati mwingine ataendelea kuona mambo mazuri kwao.

“Manispaa wako vizuri hongereni hasa katika usimamiaji wa miradi kwa hilo hawajatuangusha nitoe pongezi kwa Meya wa Manispaa na Madiwani wake pamoja na Mkurugenzi kwa kazi ambayo wanafanya hapa na zaidi muongeze bidii katika kusimamia na kutekeleza.

“Ninaamini mambo yataendelea kuwa mazuri nimeona huduma zetu za afya zimeimarika na sasa hata mikoa ya jirani wameanza kuja hapa kutibiwa," alisema Mlata.

Akiwa katika Zahanati ya Unyianga, Mlata alisema: “Nimefurahishwa na kile ambacho kinafanywa katika Zahanati (Unyianga) kwa taarifa hii niliyopokea hapa kuwa wameweza kuzalisha mama 14 na wote wakatoka wakiwa na afya njema pamoja na watoto wao ni jambo zuri na ni wapongeze hawa vijana wawili (daktari na muuguzi) kwa kazi kubwa ambayo wamefanya.

“Lakini hizi ndizo juhudi na kazi ambayo inafanywa na Serikali ya Awamu ya Sita ya Dkt Samia Suluhu Hassan ambaye ni Rais wetu kwa kuhakikisha wananchi wake wapata huduma bora hasa katika afya.”