HONGERA MANISPAA YA SINGIDA KWA KUJALI WATUMISHI

Posted on: May 1st, 2023

SHIRIKISHO la Vyama vya Wafanyakazi nchini (TUCTA) mkoa wa Singida, limeipongeza Manispaa ya Singida kwa mwenendo wake wa kuwajali Wafanyakazi, kuanzia ngazi yachini mpaka ngazi ya juu.

Akizungumza kwenye maadhimisho ya Siku ya Wafanyakazi Duniani, ambayo kimkoa yalifanyika katika uwanja wa Liti ( Namfua) Manispaa ya Singida, Mwenyekiti wa TUCTA Mkoa, Agnes John, amesema Halmashauri zingine zinapaswa kuiga mfano huo.

Katika maadhimisho hayo, Mwenyekiti huyo aliitaja Manispaa ya Singida na Halmashauri ya Wilaya ya Ikungi kuwa zimefanya vizuri zaidi mwaka huu, kwa kujali watumishi wake, kuanzia wale wa ngazi ya chini, hadi ngazi ya juu.

“Kwa kweli safari hii ndugu mgeni rasmi Manispaa ya Singida na Halmashauri ya Wilaya ya Ikungi, zimefanya vizuri sana katika kuwajali watumishi wake, naziomba Halmashauri nyingine muige mfano huu,”alisema.

Mwenyekiti huyo amefafanua kuwa, katika kujali wafanyakazi wake, Manispaa ya Singida, tayari imependekeza majina ya watumishi wanaostahili kupandishwa daraja mwakani, jambo ambalo ni nadra sana  kufanywa kwa wakati.

Kutokana na hali hiyo, Mwenyekiti huyo wa TUCTA, amemwomba mgeni rasmi kwenye maadhimisho hayo, Mkuu wa Mkoa wa Singida, Peter Serukamba, kukabidhi zawadi maalumu kwa washindi, kama njia mojawapo ya kutambua juhudi zao katika kuwajali watumishi wake.

Awali katika risala ya wafanyakazi, iliyosomwa na Mratibu wa TUCTA mkoa, Maria John Bange, ilisema kuwa pamoja na juhudi kubwa ya watumishi kazini, bado watumishi hao wana madai kadhaa, ambayo yakitatuliwa yataboresha mazingira ya kazi.

Ametaja baadhi ya kero hizo ni mishahara midogo isiyoendana na mahitaji halisi ya sasa, tatizo sugu la rushwa ya ngono katika harakati ya kutafuta ajira, ambalo hata hivyo hivi sasa limepungua, ikilinganishwa na miaka ya nyuma.

Aidha Bange amesema amani na utulivu nchini uliopo unachangia sana katika  kuchochea ufanisi kazini, kwani hivi sasa watumishi wanafanya kazi kwa utulivu na wanapata haki ya kupandishwa madaraja hasa wenye sifa bila usumbufu.

Mgeni rasmi katika maadhimisho hayo, Mkuu wa Mkoa wa Singida, Peter Serukamba, amewapongeza waajiri na wakurugenzi kwa kutambua umuhimu wa vyama vya wafanyakazi hali itakayochochea kasi ya maendeleo nchini.

Pia Serukamba ametumia fursa hiyo kupongeza vyama vya wafanyakazi, kuweza kudhibiti  tatizo sugu la rushwa ya ngono sehemu ya kazi, na akaitaka TAKUKURU, kufuatilia kwa kina ili kukomesha kabisa tatizo hili mkoani Singida.

Pia mkuu wa mkoa amezipongeza Halmashauri zinazowaendeleza kimasomo watumishi wake, kwani huo ni wajibu wao katika kuhakikisha wafanyakazi wanapata ujuzi zaidi kwa ajili ya kumudu utendaji kazi unaoendana na kasi ya maarifa ya Sayansi na Teknolojia.

Siku ya wafanyakazi Duniani huadhimishwa kila mwaka Mei Mosi ikiambatana na shamrashamra za kuwatuniku watumishi hodari kwa tuzo mbalimbali