HOSPITALI YA MANISPAA YA SINGIDA YAPOKEA MADAKTARI BINGWA WA RAIS DKT SAMIA SULUHU HASSAN

Posted on: September 23rd, 2024

Hospitali ya Halmashauri ya Manispaa ya Singida leo, Septemba 23, 2024 imepokea Madaktari Bingwa wa Rais Dkt. Samia Suluhu Hassan, ambao tayari wameshaanza kutoa huduma rasmi kwa wananchi.

Dkt. Andrew John Nyangi, bingwa wa magonjwa ya wanawake na ukunga, ambaye ni kiongozi wa msafara huo, alieleza kuwa wamekuja kutoa huduma za kibingwa kwa wananchi, akihamasisha umma kujitokeza ili kupata matibabu.

“Tunajua wananchi wanahitaji huduma hii kwa sababu hawawezi kufika hospitali nyingine. Hivyo, tuko hapa kuwafikia na lengo letu ni kuwapa huduma bora na kuwarudishia tabasamu.”

Madaktari bingwa wanaotoa huduma katika hospitali hiyo ni pamoja na bingwa wa magonjwa ya wanawake, watoto, upasuaji, usingizi na ganzi, magonjwa ya ndani, kinywa na meno, pamoja na muuguzi mkunga na mifupa.

Ujio huu ni awamu ya pili ya madaktari hao katika hospitali ya Manispaa ya Singida, ambapo watakuwa hapo kwa siku saba, wakitoa huduma kwa wananchi ambao wameshindwa kufika katika hospitali kubwa.

Ikumbukwe kwamba Mhe. Rais Dkt. Samia Suluhu Hassan amekuwa akihakikisha huduma hizi zinapatikana nchi nzima, akilenga kuwafikia wananchi wa kila ngazi ambao wanakabiliwa na changamoto za kupata huduma za afya.

Wananchi wote wanakaribishwa kutembelea Hospitali ya Manispaa ya Singida ili kupata huduma stahiki.