IDARA YA ELIMU MANISPAA YA SINGIDA YAWEKA MKAKATI ILI KUONGEZA UFAULU

Posted on: February 6th, 2023

Maafisa Elimu Kata, Walimu Wakuu na Wakuu wa shule katika Manispaa ya Singida, wamejiwekea mkakati na kufikia Maazimio muhimu, ya kuongeza ufaulu kwa wanafunzi, ili kuinua taaluma kwenye Halmashauri hiyo.

Maazimio hayo yamefikiwa kwenye kikao cha pamoja, kati ya Walimu hao, waliokutana katika ukumbi wa sekondari Mwenge mjini Singida, kutathmini matokeo ya darasa la saba (PSLE-2022), kidato cha nne mwaka 2022 na utekelezaji wa Mafunzo Endelevu kwa Walimu Kazini, (MEWAKA).

Akizungumza kwenye kikao hicho, Mkuu wa Idara ya Elimu Msingi, Omar Maje, ambaye alimwakilisha Mkurugenzi wa Manispaa, amesema kuwa, maazimio yaliyofikiwa yatasaidia kuongeza ufaulu na kuimarisha elimu katika Manispaa ya Singida.

Baadhi ya maazimio ya kikao kazi hicho ni pamoja na kuwepo kwa Mafunzo Endelevu kwa Walimu Kazini (MEWAKA), kwa shule zote za Msingi na Sekondari, azimio lililopaswa kuanza utekelezaji wake mara moja.

• Azimio lingine ni kuwepo kwa Mafunzo ya pamoja juu ya mfumo wa LMS (Learning Management System), yatakayofanyika siku ya Alhamisi tarehe 09.02.2023, ili kutoa fursa kwa walimu kuufahamu vyema.
• “Mafunzo Endelevu kwa Walimu Kazini (MEWAKA), ni jambo la lazima hivyo liwekewe ratiba ambayo haitaathiri ratiba ya ufundishaji wa vipindi darasani…mafunzo yafanyike mara moja kwa wiki ngazi ya shule na mara moja kwa mwezi ngazi ya kata,” alisema Maje
• Aidha, suala la Walimu mahiri waliopata nafasi ya kushiriki zoezi la kusahisha mitihani kitaifa limetajwa kuwa ni fursa mojawapo, hivyo wametakiwa kutumia fursa hiyo kwa kuwapitisha wenzao katika tathmini ya mitihani na kutatua changamoto za mada ngumu.
• Pamoja na hayo, washiriki wa kikao hicho wamependekeza kufanyika kwa vikao vya Jumuiya za kujifunza (JZK) na kuhakikisha kumbukumbu zinatunzwa, ikiwemo Mihtasari na Mahudhurio na uwepo wa huduma ya chakula wakati wa mafunzo ili kurahisisha mafunzo.
• Maje amesema kuwa, Wakuu wa shule, walimu wakuu na Maafisa Elimu Kata kabla ya kuanza utekelezaji wa MEWAKA, ni vyema wakawapitisha walimu ili waone umuhimu wa mafunzo hayo.
• MEWAKA ni moja ya afua katika programu ya Shule Bora yenye lengo la kuinua kiwango cha Elimu katika halmashauri za mikoa 9 ambazo zimekuwa na matokeo hafifu kielimu, mkoa wa Singida ukiwa miongoni mwa miko hiyo