”IMARISHENI UHUSIANO BAINA YENU WANANCHI NA WATAALAMU”- MHE. KIARATU

Posted on: January 9th, 2025

Wenyeviti wapya wa mitaa na vijiji katika Manispaa ya Singida, wameaswa kuimarisha mahusiano baina yao, wananchi na wataalamu ili kuleta ushirikiano katika kutekeleza majukumu yao.

Wito huo umetolewa leo tarehe 9 Januari 2025 na Mstahiki Meya wa Manispaa ya Singida, Yagi Maulid Kiaratu, wakati akifungua mafunzo ya siku moja yaliyotolewa kwa wenyeviti hao ikiwa ni kuwajengea uwezo katika kutekeleza majukumu yao . Mafunzo hayo yalifanyika katika ukumbi wa Shule ya Sekondari ya Mwenge , Manispaa ya Singida.

Mhe. Kiaratu amesema wenyeviti hao ndio wenye kusimamia kundi kubwa la wananchi, hivyo kuwataka kuwaelewa na kuwachukulia kila mmoja kwa namna alivyo bila kumwacha mtu nyuma.

“ uongozi wenu umepewa dhamana ya kusimamia na kuongoza kundi kubwa la watu, hivyo wachukulieni kila mmoja kwa namna alivyo bila kuwaacha nyuma, …vichaa ni wenu, walevi ni wenu, mashehe na mapadre ni wenu” amesisitiza Mhe. Kiaratu.

Aidha kiarau amewaasa viongozi hao kushirikiana na kamati mbalimbali katika mtaa au kijiji anachokiongoza lengo likiwa ni kufikia malengo kimaendeleo.            “ shirikisheni kamati zilizopo eneo lako na hasa wataalamu. Usijione kuwa ni mwenyekiti ukafanya maamuzi yasiyo shirikishi”, ameasa Kiaratu.

Kiaratu amewataka pia wenyeviti hao kusimamia vyema suala na ukusanyaji mapato na kuhakikisha  taarifa za mapato na matumizi zinawekwa wazi kwa wananchi. Amesisitiza pia suala la kusimamia uhifadhi wa mazingira kwa kuhimiza upandaji miti katika kaya na taasisi katika mitaa na vijiji vyao.

Katika kuhitimisha hotuma yake ya ufunguzi Kiaratu amesema, mafunzo wanayopatiwa yakakajenge umoja baina yao watembee katika njia moja ili wote wafikie mafanikio kimaendeleo bila kumuacha mmoja wao nyuma. Aidha ameahidi kama halmashauri kutoa ushirikiano wa kina pale inapobidi kufanya hivyo kwa ajili ya maendeleo ya Manispaa ya Singida.

Jumla ya wenyeviti wa mitaa na vijiji 72 waliochaguliwa katika uchaguzi wa serikali za mitaa uliofanyika Novemba  2024, wamepatiwa mafunzo hayo yaliyotolewa na Ofisi ya Rais , Tawala za Mikoa na serikali za Mitaa kupitia Chuo cha Serikali za Mitaa Hombolo