INEC YATOA MAFUNZO KWA WAANDISHI WASAIDIZI NA WAENDESHA VIFAA VYA BAYOMETRIKI

Posted on: May 14th, 2025

Tume Huru ya  Taifa ya Uchaguzi (INEC) leo Mei 14, 2025, katika Ukumbi wa Chuo cha Maendeleo ya Wananchi (FDC)imeendesha mafunzo maalum kwa Waandishi Wasaidizi, Waendesha Vifaa vya Bayometriki vya Uandikishaji (BVR) na Wasimamizi Wasaidizi Ngazi ya  Kata (AROs) katika Jimbo la Singida Mjini.

Mafunzo hayo ni sehemu ya maandalizi kuelekea zoezi la Uboreshaji wa Daftari la Kudumu la Wapiga Kura awamu ya pili, linalotarajiwa kufanyika kuanzia Mei 16 hadi 22, 2025 katika Jimbo la Singida Mjini.

Jumla ya washiriki 108 wameshiriki katika mafunzo hayo yaliyoendeshwa na Mratibu wa Uandikishaji Mkoa wa Singida kutoka INEC, Bw. Lazaro Madembwa kwa kushirikiana na Maafisa TEHAMA kutoka INEC, akiwemo Jerry Mhagama, Aziza Mikindo, Mariam Sultani pamoja na Maafisa TEHAMA kutoka Halmashauri ya Manispaa ya Singida, Fadhili Mshamu na Elvis Mkunta.

Akizungumza wakati wa mafunzo hayo, Bw. Madembwa alieleza kuwa lengo kuu la mafunzo ni kuwawezesha washiriki kupata uelewa wa kina na umahiri wa kutumia vifaa vya BVR, sambamba na kuzingatia taratibu sahihi za uandikishaji wa wapiga kura ili kuhakikisha uboreshaji huo unafanyika kwa ufanisi na kwa kuzingatia sheria.

Hata hivyo,  kabla ya kuanza kwa mafunzo, Afisa Mwandikishaji wa Jimbo la Singida Mjini, Bw. Edward Mboya aliwaongoza washiriki kula kiapo cha  kutunza siri na kujitoa uanachama, ikiwa ni hatua ya kuhakikisha kwamba watatekeleza majukumu yao kwa kufuata sheria, kanuni na miongozo ya Tume Huru ya Taifa ya Uchaguzi.

“Tume inasisitiza uadilifu, uwazi na kufuata sheria katika utekelezaji wa zoezi hili muhimu kwa mustakabali wa demokrasia nchini,” alisema Bw. Mboya.

Zoezi la uboreshaji wa daftari linatarajiwa kuwapa nafasi wananchi ambao hawakujiandikisha awali, waliopoteza kadi au waliohama maeneo yao ya awali, kujiandikisha upya au kufanya marekebisho muhimu ili waweze kushiriki kikamilifu katika chaguzi zijazo.

Hata hivyo zoezi hili litaenda sambamba na zoezi la Uwekaji Wazi wa Daftari la Awali la Wapiga Kura.