KAIMU MKURUGENZI WA MANISPAA YA SINGIDA AWATAKIA HERI YA MWAKA MPYA 2023 WATUMISHI.

Posted on: December 31st, 2022

Kaimu Mkurugenzi wa Halmashauri Manispaa ya Singida Jeshi Lupembe amewatakia heri ya mwaka mpya 2023 watumishi wote wa Manispaa katika hafla iliyofanyika katika ukumbi wa ofisi ya Manispaa ya Singida siku ya Ijumaa Tarehe 30/12/2022.

Katika hafla hiyo, Kaimu Mkurugenzi wa Manispaa amewapongeza watumishi wote kwa kufanya kazi kwa bidii kiasi kwamba Manispaa imepata mafanikio makubwa kwa mwaka 2022 ambao unaisha. Akieleza mafanikio hayo ni pamoja na ujenzi unaoendelea wa miradi mbalimbali kama vile kituo cha Afya cha Mtipa, Machinjio  yaliyopo Ng’aida na mambo mengine mengi yanayotekelezwa kwa fedha za mapato ya ndani.

Kaimu Mkurugenzi ameeleza kuwa, mafanikio hayo yamechagizwa Zaidi na ukusanyaji mzuri wa mapato kwa kubuni vyanzo vipya na kudhibiti upotevu wa mapato. Kaimu Mkurugenzi amewataka watumishi kuendelea kubuni vyanzo vipya na kudhibiti upotevu wa mapato kwa nguvu Zaidi katika mwaka ujao wa 2023 ili miradi mingi itekelezwe na stahiki za watumishi zilipwe kwa wakati.

Ndugu Jeshi Lupembe amewataka watumishi kutumia vizuri muda wa kazi kwa kufanya kazi kwa bidii kwa masaa yote nane (8) bila kupoteza muda hasa kwa kutumia masaa mengi wakati wa chai na chakula, pia amewaasa watumishi kuacha kuzurula nje wakati wa kazi kwani kwa kufanya hivyo watumishi hawaitendei haki Serikali na Wananchi kwa ujumla hivyo kurudisha maendeleo nyuma.

 Watumishi wamefurahi sana kwa kitendo cha Kaimu Mkurugenzi kutenga muda wake wa kufanya hafla fupi na watumishi na kuwatakia heri ya mwaka mpya 2023, watumishi wameahidi kutekeleza yote waliyoagizwa, pia nao wamemtakia Kaimu Mkurugezi heri ya mwaka mpya 2023 na kumtakia Afya njema huku wakiomba Mungu awafikishe salama mwaka 2023.