KAMATI YA AFYA YASISITIZA ELIMU JUU YA CHANJO MPYA YA POLIO

Posted on: May 3rd, 2025

Kamati ya Afya ya Msingi ya Halmashauri ya Manispaa ya Singida imekutana leo Mei 3, 2025, kujadili na kutoa taarifa juu ya kampeni ya chanjo mpya ya polio, sambamba na kuweka mikakati ya kutoa elimu kwa wananchi kuhusu umuhimu wa chanjo hiyo kwa watoto kuanzia umri wa miezi tisa.

Kikao hicho kiliongozwa na Kaimu Mwenyekiti wa Kamati hiyo ambaye pia ni Katibu Tawala wa Wilaya ya Singida, Bi Naima Chondo, ambapo alisisitiza juu ya umuhimu wa elimu kwa jamii kuhusu chanjo hiyo mpya inayotolewa kwa njia ya sindano.

"Ni muhimu wananchi wakapata elimu ya kutosha kuhusu chanjo hii ili waweze kuwa na uelewa na kuwapeleka watoto wao kupatiwa chanjo kwa wakati," alisema Bi Chondo.

Chanjo hiyo, ambayo tayari imezinduliwa rasmi, itakuwa endelevu na itatolewa katika vituo vyote vya kutolea huduma za afya ndani ya Manispaa ya Singida.

Kikao hicho kilihusisha timu za uendeshaji wa huduma za afya (CHMT na HMT), wataalam, viongozi wa dini pamoja na wajumbe wa kamati ya ulinzi na usalama ya wilaya, ambao wote wanatarajiwa kuwa mabalozi wa kueneza elimu hiyo kwa jamii katika maeneo yao.

Lengo kuu la kikao hicho ilikuwa ni kuhakikisha taarifa kuhusu chanjo hiyo mpya inawafikia wananchi wote kwa wakati ili waweze kujitokeza kwa wingi na kupeleka watoto wao kupata chanjo dhidi ya ugonjwa wa polio.

Bi Chondo aliongeza kuwa utoaji wa elimu kwa jamii ni hatua muhimu katika kuhakikisha mafanikio ya kampeni hiyo, huku akisisitiza kuwa chanjo hiyo itasaidia kuwalinda watoto dhidi ya madhara makubwa yanayosababishwa na ugonjwa wa polio.