KAMATI YA MIKOPO NGAZI YA KATA YAPEWA MAFUNZO

Posted on: November 6th, 2024

Ikiwa ni mwendelezo wa mafunzo, Kamati ya Mikopo Ngazi ya Kata katika Manispaa ya Singida leo imekula kiapo cha utii na kupatiwa mafunzo maalum ya kusimamia mikopo ya asilimia 10 kwa vikundi vya wanawake, vijana, na watu wenye ulemavu.

Mafunzo hayo yamefanyika katika Kituo cha Mwalimu Nyerere, na yakisimamiwa na Kaimu Mkurugenzi wa Manispaa ya Singida, Hillary Makundi.

Makundi alisisitiza umuhimu wa kufuata miongozo na kanuni za utekelezaji wa mikopo, akisema kuwa kamati inategemewa kuhakikisha mikopo inatolewa kwa usahihi na miradi iwe inatekelezeka na iwe na tija kwa jamii.

"Tunategemea kamati itasimamia miongozo yetu na kuhakikisha miradi inayoenda kufanywa na vikundi inatekelezeka.

"Ndiyo maana tumewajumuisha wataalamu katika kamati ili kuweka mambo sawa na kuhakikisha hakuna dosari na walengwa wananufaika," alisema Makundi.

Aliongeza kuwa kamati inatakiwa kutambua majukumu yao kwa kina, kwani ni sehemu ya utekelezaji wa agizo la serikali.

"Kiapo mnachokula ni uthibitisho wa kujitolea kwenu kusimamia mikopo hii kwa ufanisi, ili kuhakikisha miradi yote inatekelezwa kwa mujibu wa kanuni na miongozo ya serikali," alisisitiza.

Makundi alifafanua kuwa, kama kamati itaweka juhudi katika kutimiza wajibu wake, utekelezaji wa mikopo utakuwa rahisi kutoka ngazi ya chini hadi juu.

"Kama kila mmoja akitimiza wajibu wake na kufuata kanuni hizi, utekelezaji utakuwa na mafanikio," alieleza.

Mafunzo haya ya siku moja yalihusisha Watendaji wa Kata, Maafisa Maendeleo ya Kata, Maafisa Ustawi wa Jamii, Maafisa Elimu ya Kata, Polisi wa Kata, Maafisa Ugani wa Kata, pamoja na Watendaji wa Vijiji na Mitaa.

Kamati hii ya Mikopo Ngazi ya Kata inatarajiwa kuwa daraja muhimu katika kuhakikisha kwamba mikopo ya asilimia 10 inawafikia walengwa.