KAMATI YA MIKOPO YA MANISPAA YA SINGIDA YAKUTANA KUJADILI MAOMBI YA VIKUNDI VYA UCHUMI

Posted on: January 4th, 2025

Kamati ya Mikopo ya Halmashauri ya Manispaa ya Singida imekutana kujadili maombi mbalimbali yaliyowasilishwa na vikundi zaidi ya 40 vinavyojishughulisha na shughuli za kiuchumi.

Kamati hiyo ilikutana jana, Januari 3, 2025, katika Ukumbi wa Halmashauri ya Manispaa ya Singida, kujadili maombi hayo na kuangalia vigezo vya vikundi vinavyohitaji mikopo.

Hadi sasa, kamati mbalimbali zimeundwa kuanzia ngazi ya Kata ili kusimamia mikopo inayotokana na asilimia 10 ya mapato ya ndani. Hii ni kufuatia dirisha la mikopo kufunguliwa tena baada ya kusimama kwa muda ili kupisha mchakato wa kuboresha miongozo na taratibu za usimamizi wa mikopo hiyo.

Akizungumza baada ya kikao hicho, Mwenyekiti wa Kamati, Hillary Makundi, ambaye pia ni Mkuu wa Divisheni ya Kilimo, Mifugo na Uvuvi, alieleza kuwa kamati hiyo imeweza kuchambua na kujadili maombi yaliyowasilishwa ili kuangalia vikundi vyenye sifa ya kukopeshwa.

Maombi hayo yaliwasilishwa katika kipindi cha robo ya pili ya mwaka, kuanzia Oktoba hadi Desemba 2024. Kamati hiyo inatarajia kutoa majibu kuhusu vikundi vilivyokubalika kwa mikopo baada ya uchambuzi wa kina.