KAMATI ZA SHULE ZATAKIWA KUWA MSTARI WA MBELE KUHAMASISHA WAZAZI JUU YA HUDUMA YA CHAKULA SHULENI

Posted on: February 7th, 2023

Kamati za shule katika Manispaa ya Singida zimetakiwa kuhamasisha wazazi kuchangia huduma ya chakula kwa wanafunzi shuleni ili kuwawezesha kusoma na kuelewa vyema.

Wito huu umetolewa na wajumbe wa kamati ya lishe Manispaa katika kikao  cha robo ya pili kilichofanyika leo tarehe 07 February 2023 katika ukumbi wa Manispaa, baada ya Afisa Lishe wa Manispaa, Isaac Maseri, kuwasilisha taarifa yake ambayo ilionesha mwitikio usioridhisha wa utoaji huduma ya chakula shuleni.

Mwenyekiti wa Kamati hiyo, Kaimu Mkurugenzi wa Manispaa, Dr. Adrianus Kalekezi, amesema ni wakati sasa wa wazazi kuamka na kuunga mkono suala la lishe shuleni ili kumpa mwanafunzi utulivu wa akili na nguvu ya kusoma na kuelewa vyema.

“ Mwanafunzi akiwa na njaa hata akili inadumaa….. ni muda sasa kwa kamati za shule kuhamasisha wazazi waone umuhimu wa jambo hili” amehimiza Kalekezi.

Akitoa mchango, Afisa Afya Kata ya Misuna, Isack Madono amesema, wazazi wakielimishwa na kuhamasishwa zoezi la kuchangia  huduma chakula shuleni litafanikiwa kwa kiasi kikubwa , huku akitoa mfano wa namna wazazi wanajitoa kipindi cha utoaji dawa za minyoo na kichocho shuleni ambapo wazazi huwa na mwamko mkubwa wa kuchangia chakula  kutokana na kuelimisha umuhimu wa zoezi hilo.

“Issue hapa ni usimamizi thabiti kuanzia ngazi ya kata kama ambavyo zoezi la utoaji dawa za minyoo na kichocho linavyofanyika”, amesema Madono

Naye Kaimu Afisa Maendeleo ya Jamii wa Manispaa, Cosmas Ngafa, akichangia hoja kuhusu huduma ya chakula shuleni, amesema kamati za shule ni kiungo muhimu sana baina ya wazazi na uongozi mzima wa shule na kata, hivyo ameshauri kamati hizo kutumiwa vyema ili kuhamasisha wazazi na kuwaelimisha ili kutekeleza azma ya kutoa huduma shuleni.

Ngafa ametoa mfano wa shule ya Sekondari Senge ambayo tayari imeanza kutoa huduma ya chakula baada ya kikao baina ya kamati ya shule na wazazi kufikia muafaka wa kuchanga fedha kwa ajili ya chakula, hali iliyotoa nafasi kwa wanafunzi kusoma katika masaa ya ziada kwa kuwa wanakuwa wameshiba.

Aidha Wajumbe wa kamati ya lishe wametoa wito kwa watoa huduma za afya  ngazi ya jamii, kupita katika kaya na kutoa elimu ya umuhimu lishe bora na hasa katika ukuaji wa mtoto ili kuondokana na tatizo la udumavu ambayo ni matokeo ya lishe duni.

Mkuu wa Idara ya  Elimu Msingi Manispaa, Omar Maje, ambaye ni mjumbe wa kamati hiyo, ameshauri kuwa, mwenyekiti wa kamati ambaye ni Mkurugenzi wa Manispaa ahakikishe kipengele cha lishe kinakuwa moja ya agenda za kudumu katika kikao cha kujadili hali ya mapato ambacho hufanyika kila mwanzo wa wiki (Jumatatu) katika Manispaa ya Singida

Amesema, kupitia kikao hicho watendaji wa Kata watapata nafasi ya kutoa taarifa ya utekelezaji masuala ya lishe katika Kata zao pamoja na kuainisha changamoto wanazokutana nazo ili ziweze kupatiwa ufumbuzi.

Maje ameshauri pia walezi wa Kata wafanye ufuatiliaji wa katika kata zao ili kufanikisha zoezi hili huku akiipongeza kata ya Mughanga ambayo imekuwa ikihamasisha wananchi wake katika mitaa na vikao mbalimbali.