KAYA 5,396 MANISPAA YA SINGIDA ZIMENUFAIKA NA MFUKO WA MAENDELEO YA JAMII (TASAF) DIRISHA LA SEPTEMBA - OKTOBA, 2023

Posted on: March 22nd, 2023

Kaya 5,396 za Manispaa ya Singida zimenufaika na Mfuko wa Maendeleo ya Jamii nchini (TASAF), kwa kuwezeshwa rasilimali fedha zaidi ya Sh. Milioni 420.3/=, ikiwa ni malipo ya dirisha la Septemba-Oktoba 2022, yaliyofanyika Mwezi March, 2023.

Kaimu Mratibu wa Tasaf, Manispaa ya Singida, Yahaya Fotta, amesema, fedha zilizotolewa kwa walengwa ni nyingi kwani ni za miezi miwili ya Septemba na Oktoba, 2023, hivyo kuwaasa walengwa , kutumia vyema malipo yao ili kuwanufaisha kwa kuwaimarisha kiuchumi.

Fotta amewataka walengwa hao kujikita zaidi kwenye miradi ya uzalishaji mali hasa katika msimu huu wa kilimo lakini pia  miradi ile ya kukuza uchumi wa kaya kama ufugaji ili kuiwezesha kaya kuondokana na umaskini.

“ wahakikishe wanajikita zaidi kwenye miradi ya uzalishaji mali kupitia fedha za ruzuku wanawzozipata….mfano msimu huu ni wakili basi fedha wanazozipata ziweze kusaidia katika kilimo na pia miradi ile ya kuinua uchumi wa kaya kama ufugaji” ameasa Fotta.

Baadhi ya wanufaika wa Mfuko huo, wamelalamikia kuchelewa kutolewa kwa fedha za Septemba na October na kusema kuchelewa huko kumepelekea baadhi yao kushindwa kuwahi msimu wa kilimo kwa kukosa fedha za kununua mbegu

Mzee Iddi Kiemi , Mkazi wa Irao , Manispaa ya Singida amesema fedha hiyo ingetolewa kwa wakati, wangeweza kuwahi msimu wa kilimo na kujipatia chakula kitakacho wa kimu  kwa muda mrefu

“ nimeshachelewa msimu wa kilimo, nitanunua debe mbili za mahindi lakini nitalima viazi viazi ambavyo vitahimili msimu wa kiangazi” amesema Mzee Iddi.

Pamoja na malalamiko hayo walengwa walio wengi wameishukuru serikali kwa kutoa malipo hayo kwani wameweza kununua chakula na kulipa ada za shule kwa watoto wao.

Bi Neema Ghandya mkazi wa Kisaki B, Kata ya Kisaki Manispaa ya Singida, anasema ameweza kununua mbegu na kulima pamoja na kuikimu familia yake na kwamba ana matumaini makubwa ya mavuno kwani hali ya mazao shambani ni nzuri.

“ Nimelima nimenunua mbegu kwa kweli hali ya shamba ni nzuri tu, ….watoto wangu wanachakula kwa kweli tunaishukuru Serikali”, amesema Bi Neema

 Naye Bwana Raphael Senge Mkazi wa Kisaki A , Kata ya Kisaki, amesema, kwa fedha alizopata ameweza kununua chakula hali inayomwezesha kufanya kazi za kilimo kwa uhakika, kununua mahitaji ya shule ya watoto wake  pamoja na mahitaji mengine madogomadogo, ikiwa ni pamoja na kufanya vibarua kwa kuwa uhakika wa chakula anao.

Wananchi 5,396 wanaolipwa fedha  kupitia Mfuko wa Maendeleo ya Jamii nchini (TASAF), wanatarajiwa kuimarika zaidi kiuchumi, kutokana na malipo waliyopata kwa kuanzisha miradi ya kiuchumi, ikiwemo ile ya kilimo.