KISHINDO CHA MAFANIKIO YA MIAKA 3 YA SERIKALI YA AWAMU YA 6 MKOANI SINGIDA

Posted on: April 7th, 2024

Mkoani wa Singida leo umejivunia mafanikio lukuki ya miradi mbalimbali ya maendeleo inayotekelezwa na Serikali ya awamu ya Sita chini ya uongozi wa Mheshimiwa Rais Dkt. Samia Suluhu Hassan, ambapo Mkuu wa Mkoa huo, Mhe. Halima Dendego, ameeleza mafanikio yaliyopatikana katika kipindi cha miaka mitatu ya Serikali ya awamu hiyo kwa kubainisha kukua kwa pato la mkoa na la mwananchi mmoja mmoja.

Dendego ameyasema hayo Aprili 7, 2024 wakati wa hafla fupi ya kueleza mafanikio ya Serikali ya Awamu ya Sita katika Mkoa wa Singida hafla iliyoambatana na futari kwa baadhi ya viongozi wa Dini, Chama, Wabunge wa Mkoa huo, wadau wa maendeleo pamoja na baadhi ya wananchi waliohudhuria.

Akizungumza na viongozi, wadau wa maendeleo na wananchi katika hafla iliyofanyika kwenye viwanja vya Makazi ya Mkuu wa Mkoa huo mjini Singida, amesema wastani wa pato la Mkoa limeongezeka kutoka Sh.Trilioni 2.709 mwaka 2020/2021 hadi kufikia Sh.Trilioni 3.196.

Dendego amesema kwa upande wa wastani wa pato la mwananchi mmoja mmoja kwa Mkoa wa Singida umefikia Sh. 1,589,073 mwaka 2022/23.

Aidha, amesema wastani wa ukusanyaji mapato kupitia Mamlaka ya Mapato Tanzania (TRA) ni Sh. bilioni 12.382 kwa mwaka na wastani wa ukusanyaji wa mapato ya ndani kwa Halmashauri ni Sh.bilioni 16.285.

Dendego amesema katika kipindi hicho Mkoa umepokea Sh. Trilion 1.7 kutoka Serikali kuu kwa ajili ya uendeshaji shughuli mbalimbali ikiwemo utekelezaji wa miradi ya maendeleo.

Hata hivyo, ameeleza kuwa katika kuwainua wananchi kiuchumi, jumla ya Sh. 3,068,836,418 zimetolewa kwa vikundi vya wanawake, vijana na watu wenye uelemavu na Sh. 2,258,086,426.61 zimetengwa kwa ajili ya kuvikopesha vikundi hivyo mara Serikali itapotoa mwongozo mpya.

Akiendelea na wasilisho lake, Mkuu wa Mkoa huyo amesema Serikali kupitia Mpango wa Kuhudumia Kaya Maskini (TASAF) imerudisha matumaini na furaha kwa takribani kaya 58,090.

Amesema walengwa wameguswa kwa kupatiwa fedha za moja kwa moja kiasi cha Sh. Bilioni 22.083 kupitia utekelezaji wa miradi mbalimbali ya maendeleo.