MAAFISA MIFUGO KATA ZA MTIPA, UHAMAKA NA MTAMAA WAPATIWA PIKIPIKI

Posted on: December 15th, 2023

Halmashauri ya Manispaa ya Singida imepokea pikipiki 03 kutoka Wizara ya Mifugo na Uvuvi kwa ajili ya maafisa mifugo ngazi ya kata ili kuboresha huduma za mifugo katika kata zilizopata pikipiki na maeneo ya pembezoni.

Akikabidhi pikipiki hizo leo Desemba 15, 2023 Mstahiki Meya wa Manispaa ya Singida, Yagi Maulid Kiaratu, amewataka maafisa mifugo waliokabidhiwa pikipiki hizo kuzitumia kwa malengo kusudiwa na sio vinginevyo.

Makabidhiano hayo yamefanyika Makao makuu ya ofisi za Manispaa ya Singida na kushudiwa na wakuu wa Idara na Vitengo, maafisa Ugani, watendaji wa kata, mitaa na vijiji, maafisa elimu kata, maafisa maendeleo ya jamii ngazi ya kata na watumishi wote wa makao makuu ya Manispaa.

“Ninaamini huduma za mifugo katika kata zenu na kata jirani zitaimarika na wananchi watanufaika kwa elimu ya ufugaji bora pia huduma za dawa za mifugo”, amesema Mstahiki Meya.

Pikipiki hizo zimepelekwa katika Kata za Uhamaka, Mtipa na Mtamaa ambapo pia maafisa hao watatoa huduma kwenye kata jirani baada ya kuwezeshwa vyombo hivyo vya usafiri.

Mstahiki meya amewataka maafisa ugani kushirikiana katika kuhakikisha huduma za ugani zote zinaimarika ikiwa ni pamoja na kusimamia ukusanyaji wa mapato yatokanayo na mifugo na kilimo katika kata zao.

Awali kabla ya makabidhiano hayo Mkurugenzi wa Manispaa ya Singida Jeshi Lupembe, amekuwa na kikao na watumishi ngazi ya kata akihimiza masuala mbalimbali ikiwa ni pamoja na usimamizi shirikishi wa miradi pamoja na kubaini vipaumbele vya kata hizo, masuala ya usafi na mazingira, ukusanyaji mapato pamoja na kuwakumbusha wajibu wa kila mmoja katika eneo lake la kazi.

“Shirikianeni wote katika katika kusimamia miradi ya maendeleo, kuainisha vipaumbele vya kata, pia suala la usafi na mazingira na ukusanyaji wa mapato sitakuwa tayari kuwajibishwa kwa ajili ya uzembe wa watu wachache mimi najituma na nyinyi mjitume”, amesisitiza Jeshi.

“Himizeni wananchi kusafisha maeneo kuzunguka nyumba zao na mitaro pamoja na barabara mbele ya nyumba zao ni jambo la aibu kukuta takataka zinatupwa katika mitaro/ mifereji wakati viongozi mpo”, amesema Jeshi.