‘MADARASA YAKAMILIKE KWA UBORA KABLA YA MACHI 30’

Posted on: March 20th, 2024

Mkuu wa Divisheni ya Awali na Msingi, Maje Omary na timu ya Wahandisi wa Halmashauri ya Manispaa ya Singida wamefanya ukaguzi, katika Shule za Msingi 09 ambako ujenzi wa madarasa na vyoo unaendelea na ametoa maelekezo kwa walimu wakuu kuhakikisha wanakabidhi madarasa yakiwa yamekamilika kwa kiwango bora kabla ya Machi 30, mwaka huu.

Ujenzi wa Madarasa na vyoo unaendelea katika baadhi ya Shule za Msingi Kongwe katika Manispaa ya Singida, ikiwa ni fedha kutoka Serikali Kuu kiasi cha Shilingi milioni 208.

Shule ambazo zimetembelewa ni pamoja Shule za Msingi Ipembe, Kibaoni, Sabasaba, Manguamitogho, Ughaugha na Kimpungua, kila shule ikiwa imejengwa darasa moja moja na madara mawili kwa Shule ya Msingi Ukombozi. Kwa upande wa ujenzi wa matundu ya vyoo Shule ya Msingi Nyunjwi matundu 08 ya vyoo, Shule ya Msingi Mtamaa matundu 06, Shule ya Msingi Mughanga matundu 05 ya vyoo, pia matundu 04 ya vyoo na darasa moja vimejengwa katika Shule Shikizi ya Makiunje.

Maje amesema walimu wakuu wanatakiwa kuhakikisha kila kitu kinapatikana shuleni, ili mafundi waweze kukamilisha kazi kwa wakati na watumie muda wao vyema kuwasimamia.

“Kwa ujumla hali ya ujenzi inaridhisha tunategemea mpaka Machi 30, mwaka huu, ujenzi utakuwa umekamilika kwa asilimia kubwa. Wito wangu kwa walimu wakuu ni kuhakikisha mafundi wanakuwa eneo la kazi muda wote na tumepita katika baadhi ya maeneo mafundi hawakuwepo na kumekuwa na visingizio vya hapa na pale na nimetoa maelekezo kuwa mafundi lazima wawe eneo la kazi muda wote na walimu wakuu wahakikishe vifaa vyote nikuwepo eneo la kazi.

“Lakini shukrani kubwa ni kwa Rais wetu wa Jamhuri ya Muungano wa Tanzania, Dkt Samia Suluhu Hassan kwa kutupatia kiasi cha milioni 208 katika eneo hili la Elimu ya msingi na awali, hii itaboresha maeneo yetu ya kujifunza na kufundishia tunamshukuru sana kwa kuendelea kuboresha miundombinu ya elimu kwa ujumla.