MADIWANI MANISPAA YA SINGIDA WAIPONGEZA SERIKALI KWA FEDHA ZA UJENZI WA OFISI MPYA ZA MANISPAA

Posted on: September 30th, 2022

Baraza la madiwani Manispaa ya Singida, limeipongeza serikali kwa kuipatia halmashauri hiyo fedha zaidi ya shilingi Bilioni moja, kwa ajili ya ujenzi wa ofisi mpya za Manispaa, katika eneo la Karakana, kata ya Misuna.

Wakizungumza kwenye Mkutano maalumu wa Baraza hilo kwa ajili ya kupitisha hesabu za halmashauri kwa mwaka unaoishia Juni 30, 2022 na kuridhia eneo la ujenzi wa ofisi mpya za Manispaa, baadhi ya madiwani wamesema, uamuzi wa serikali kuidhinisha fedha hizo, utawezesha kupatikana huduma bora kwa wananchi pia mazingira bora ya ufanyaji kazi kwa watumishi , ikilinganishwa na ofisi za sasa zilizojengwa miaka 40 iliyopita.

Naye Katibu wa CCM wilaya ya Singida mjini Shaaban Kalaghe amempongeza Mheshimiwa Rais wa Jamhuri ya Muungano wa Tanzania, Samia Suluhu Hassan kupitia OR-TAMISEMI kwa kuona haja ya ujenzi wa jengo la utawala la Manispaa ya Singida kufuatia uchakavu mkubwa uliopo katika ofisi za sasa hali inayoishushia hadhi manispaa ya Singida.

Kalaghe amesema, kujengwa kuwa ofisi mpya za Manispaa ya Singida ni fursa nyingine ya kupanua mji lakini pia kusogeza huduma karibu na wananchi na kuruhusu mazingira bora ya kufanya kazi kwa watumishi wa Manispaa .

“ Nampongeza Rais wa Jamhuri ya Muungano kwa kuliona hili kupitia OR-TAMISEMI, lakini pia wataalamu walioweza kufanya tathminini ya kina na kupata eneo bora la ujenzi pia kwenu Madiwani mlioafiki eneo hilo kutumika kwa ajili ya ujenzi wa ofisi mpya za manispaa”, alisema.

Katibu huyo wa CCM pia amepongeza wasilisho la Kaimu Mkurugenzi wa Manispaa kupitia Jeshi Lupembe, ambalo liliwasilishwa na Mchumi wa Manispaa Jeremiah Kikonge lililopendekeza ujenzi wa kitega uchumi katika eneo la ofisi za sasa baada ya kukamilika kwa jengo jipya la utawala unaotarajiwa kuanza wakati wowote baada ya mapokezi ya fedha kutoka serikali kuu.