MAFUNZO KWA WATENDAJI NGAZI YA MKOA KUONGEZA UFANISI WA ZOEZI LA UANDIKISHAJI DAFTARI LA KUDUMU LA WAPIGA KURA

Posted on: September 14th, 2024

Tume Huru ya Taifa ya Uchaguzi imesema, mafunzo yanayotolewa kwa Watendaji ngazi ya mkoa, juu ya Maboresho ya Daftari la Kudumu la Wapiga Kura, yataongeza elimu na ujuzi, wakati kwa kuboresha daftari la wapiga kura, kwa halmashauri za Wilaya, kote nchini.

Akifungua mafunzo ya siku mbili tarehe 14 Septemba, 2024 kwa Watendaji ngazi ya mkoa wa Singida katika ukumbi wa Chuo cha Uhasibu (TIA) mjini Singida, Mjumbe wa Tume hiyo, Jaji Dk. Zakia Abubakari, amesema mafunzo hayo yatawajengea umahiri wa kufundisha Maafisa Waandikishaji Wasaidizi ngazi ya Kata.

Aidha Jaji Dk. Zakia Abubakar, amesema, baada ya elimu hiyo kushuka hadi ngazi ya Kata, wataenda pia kuyatoa kwa Waendeshaji wa Vifaa vya ki-biayometriki na Waandishi Wasaidizi, ambao ndio wahusika wakuu wa zoezi la uandikishaji wa wapiga kura vituoni.

"Ni matarajio ya Tume kuwa kutokana na mafunzo haya, kila mmoja atapata elimu na ujuzi wa kutosha,utakaomwezesha kutekeleza majukumu yake vizuri ili kufanikisha Uboreshaji wa Daftari, mafunzo haya yatawaongezea uwezo zaidi," alisisitiza.

Mafunzo haya yanahusisha namna ya ujazaji wa fomu na jinsi ya kutumia mfumo wa kuandikisha wapiga kura (Voters Registration System - VRS), ili kuwafanya washiriki wawe na uelewa wa pamoja, utakaowapa fursa ya kutumia vema mfumo, na vifaa vingine vya kuandikishia wapiga kura.

"Nimejulishwa kuwa, baadhi yenu mlibahatika kushiriki katika kuratibu na kusimamia utekelezaji wa shughuli mbalimbali za Tume, ikiwemo uboreshaji wa Daftari la Kudumu la Wapiga Kura katika awamu zilizopita.

"Hivyo kwa kutumia uzoefu mlionao na mafunzo mtakayopatiwa, ninaamini mtafanya kazi zenu kwa weledi mkubwa, bidii na moyo wa kujituma, ili kufanikisha zoezi hili,"alisema Jaji Dk. Zakia Abubakar.

Katika hatua nyingine Jaji Abubakar, amesema, wakati wa uboreshaji wa Daftari, mawakala wa vyama vya siasa wataruhusiwa katika vituo vya kuandikisha wapiga kura, Ili kusaidia uwazi wakati wote wa zoezi zima, lakini pia watasaidia kuwatambua waombaji wa eneo husika, hivyo kupunguza kutokea kwa changamoto zisizokuwa za lazima, na kuwataka kutoingilia majukumu ya watendaji, wakati wa zoezi hilo kituoni.

Baadhi ya washiriki, akiwemo Upendo Naftali, Afisa Mwandikishaji Msaidizi Jimbo, kutoka Halmashauri ya Manispaa ya Singida, amesema mafunzo hayo yatawajengea uwezo na uelewa mkubwa katika kuhakikisha wanafanikisha zoezi hilo.

Kadhalika amesema kuwa, anaamini baada ya mafunzo, wanakwenda kuongeza idadi ya wapiga kura wapya, ambao wamefikisha umri sahihi wa kupiga kura.

Washiriki wa mafunzo hayo ni Mratibu wa Uandikishaji mkoa, Maafisa Waandikishaji, Maafisa Waandikishaji Wasaidizi ngazi ya Jimbo, Maafisa Uchaguzi, Maafisa Ugavi na Maafisa TEHAMA wa Halmashauri.