MAFUNZO YA USIMAMIZI WA MIKOPO KWA VIKUNDI VYA WANAWAKE, VIJANA NA WATU WENYE ULEMAVU YATOLEWA KWA MAAFISA MAENDELEO JAMII

Posted on: October 5th, 2024

Maafisa Maendeleo ya Jamii wa Halmashauri ya Manispaa ya Singida wameanza kupatiwa mafunzo muhimu kuhusu usimamizi na utoaji wa mikopo ya asilimia 10% inayotolewa kwa vikundi vya wanawake, vijana, na watu wenye ulemavu.

Mafunzo hayo yalianza jana, Oktoba 4, 2024, katika Kituo cha Mwalimu Nyerere, Manispaa ya Singida na yanatarajiwa kudumu kwa siku tano.

Lengo la mafunzo hayo ni kuwapa maafisa hao uelewa wa kina kuhusu miongozo mpya itakayowawezesha kutoa mafunzo katika ngazi ya kata.

Mikopo ya asilimia 10 inatarajiwa kuanza kutolewa hivi karibuni, ambapo Manispaa ya Singida tayari imeandaa kiasi cha shilingi bilioni 1,101,045,729.402 kwa ajili ya robo ya kwanza.

Mikopo itakayotolewa itafuata utaratibu mpya tofauti na wa awali, huku kukiwa na kamati mbalimbali zilizoundwa ili kusimamia mchakato mzima.

Afisa Maendeleo ya Jamii Mwandamizi, Cosmas Ngafa, amesema kuwa mafunzo haya yatakuwa na umuhimu mkubwa, hasa baada ya mikopo hiyo kusimama kwa zaidi ya mwaka mmoja.

“Tunatarajia mafunzo haya yatatusaidia sana. Hivi karibuni tulikuwa hatujatoa mikopo kutokana na changamoto za urejeshaji, lakini sasa kuna kanuni na sheria mpya za utoaji na urejeshaji wa mikopo,” alisema Ngafa.

Aidha, aliongeza kuwa kamati hizo zitakuwa na jukumu muhimu katika kuhakikisha mikopo inatolewa kwa ufanisi.