MAMA SAMIA MENTORSHIP YAJAKUOKOA MAISHA YA MAMA NA MTOTO MANISPAA SINGIDA

Posted on: March 18th, 2024

Watumishi wa afya katika ngazi ya msingi Manispaa ya Singida wamejengewa uwezo ili kuimarisha huduma ya mama na mtoto katika vituo vya kutolea huduma za afya.

Elimu hiyo inatolewa na jopo la madaktari bingwa watano (05) kupitia programu ijulikanayo kama Mama Samia Mentorship ambao wanafanya kazi katika Kituo cha Afya cha Sokoine kwa muda wa siku kumi (10).

Madaktari hao ambao ni bingwa wa magonjwa ya Watoto, Wanawake, upasuaji, uzazi na mtoto na mtaalam wa madawa ya usingizi na wamepokelewa na Mganga Mkuu wa Mkoa wa Singida, Dkt Victorina Ludovick pamoja na Mganga Mkuu wa Mkuu wa Manispaa, Dkt Anwar Milulu katika Hospitali ya Manispaa ya Singida.

“Leo Mkoa wa Singida, tumetembelewa na madaktari bingwa wa programu ya Mama Samia mentorship watakuwa hapa Manispaa kwa muda wa siku 10 katika kituo cha Afya Sokoine na wengine watakuwa Itigi” amefafanua Dkt. Ludovic

Dkt. Ludovic amesema kwa kipindi cha siku 10 ambazo wataalamu hao watakuwa katika kituo cha Afya Sokoine, watafanya kazi na wataalamu wa afya katika kituo hicho, lengo likiwa ni kuwajengea uwezo iliwaweze kufanya maamuzi sahihi na pia kutoa ushauri katika masuala mbalimbali.

Kwa upande wake Kaimu Mkurugenzi wa Manispaa Dkt. Adrianus Kalekezi amewakaribisha na kuwataka wataalamu katika kituo cha Afya Sokoine kuwapa ushirikiano wa kutosha ili lengo la uwepo wao liweze kuwa la mafanikio.

Akizungumza kwa niaba ya Madaktari bingwa wenzake, Dkt Haika Maliki, ambaye ni Bingwa wa Watoto, amesema yeye pamoja na wenzake wamekuja kwa lengo la kuwajengea uwezo wataalam katika kituo hicho ili kupunguza vifo vya mama na mtoto na kwamba kupitia ushirikiano baina yao na wataalamu wa Kituo cha Afya Sokoine lengo la uwepo wao litakwenda kufanikiwa.

Kituo cha Afya Sokoine kimekuwa kikipokea idadi kubwa ya kina mama wanaofika kujifungua hali inayosababisha kituo hicho kulemewa ambapo zaidi ya kinamama 400 wamekuwa wakijifungua kituoni hapo kwa mwezi.