MKURUGENZI MANISPAA YA SINGIDA AHIMIZA USHIRIKIANO ILI KULETA TIJA KATIKA UTEKELEZAJI WA MAJUKUMU

Posted on: January 18th, 2025

Katika jitihada za kuboresha mazingira ya kufanyia kazi kwa watumishi wa Umma, Manispaa ya Singida imeahidi kuimarisha ushirikiano, utakaotatua changamoto zinazojitokeza kati ya mwajiri na mwajiriwa, ili kuleta tija na utoaji huduma sawa kwa wananchi.

Akizungumza kwenye Kikao cha Baraza la Wafanyakazi, Mkurugenzi wa Manispaa ya Singida, Joanfaith Kataraia amesema kuwa, ni kwa kutumia ushirikiano, kuboresha mazingira ya kufanyia kazi na kulipa stahiki za watumishi, ndio njia pekee itakayoweza kuondoa malalamiko na  migogoro, kati ya mwajiri na mwajiriwa.

“Manispaa ya Singida itahakikisha inaweka mazingira bora ya kufanyia kazi, ambayo baadaye yatahamasisha watumishi wetu kuweza kufanya kazi zao kwa bidii na kwa ufanisi mkubwa, ambao utasaidia kuondoa migogoro isiyokuwa ya lazima kwenye maeneo ya kazi, na hivyo kuleta tija...

“Sisi Manispaa tutahakikisha kuwa tunafanya kazi kwa kushirikiana na wafanyakazi wenzetu katika ngazo zote, lakini kwa kuheshimiana, kwa kusaidiana ili kuhakikisha tunaijenga Manispaa ya Singida, kupitia watumishi wenzetu, kwa uwepo wa mazingira ambayo ni mazuri ya kufanyia kazi,”alifafanua Mkurugenzi

Kwa mujibu wa Mkurugenzi huyo, hatua hizi mpya hazilengi tu kuboresha mazingira ya kazi, bali pia kuinua kiwango cha utoaji huduma kwa wananchi wa Manispaa ya Singida, hali itakayoondoa kero na malalamiko kwa wananchi

Kwa upande wake Mchumi wa Manispaa ya Singida, Jeremiah Kikonge alisema, Halmashauri hiyo inatarajia kukusanya zaidi ya Sh. Bilioni 45.2 kwa mwaka wa fedha 2025/2026, kutoka kwenye vyanzo vyake na, kutumia kiasi hicho, katika kutekeleza miradi yake mbalimbali ya maendeleo na shughuli nyinginezo, ikiwemo zile za utawala.

“Mheshimiwa Mwenyekiti kwenye bajeti hii tumeweza kuweka vipaumbele vifuatavyo, ikiwemo kugharamia ukamilishaji miradi ya viporo, kwa ajili ya huduma za jamii, ikiwemo afya, elimu, na masuala ya mtambuka…kuanzisha miradi ya kimkakati, kulipa stahiki za watumishi na mazingira bora, Pamoja na ukamilishaji jengo la utawala la halmsahuri ili liweze kukamilika,”alifafanua.

Akiongea kwenye Kikao cha Baraza hilo, Mwenyekiti wa Chama Cha Walimu (CWT) Mkoa wa Singida, Hamisi Mtundua, amepongeza  Bajeti ya Manispaa na kusema ni nzuri, na ameomba ikafanye kazi iliyokusudiwa, ikiwemo stahiki zote za Watumishi, wakiwemo Walimu, pia ikawe chachu ya kuwaletea wananchi Maendeleo.

Naye Katibu wa Chama cha Wafanyakazi wa Serikali za Mitaa (TALGWU) mkoa wa Singida Deogratius Rugambwa, ameipongeza bajeti ya 2025/2026 na kusema imemjali mfanyakazi kwa sehemu kubwa sambamba na miradi ya maendeleo iliyopangwa kutekelezwa.