MANISPAA YA SINGIDA IMEPONGEZWA KWA UTEKELEZAJI NA USIMAMIZI MZURI WA MIRADI YA MAENDELEO

Posted on: February 20th, 2023

Mwenyekiti wa CCM Mkoa wa Singida, Martha Mlata, ameunga mkono juhudi zinazofanywa na Manispaa ya Singida katika kutekeleza miradi ya Maendeleo, hasa ujenzi wa machinjio mpya nje ya mji na  kushauri, ujenzi huo ende sambamba na uwekaji uzio katika eneo hilo.

Mwenyekiti huyo wa CCM Mkoa, pamoja na wajumbe wa kamati ya siasa ya Mkoa wameridhishwa na utekelezaji sambamba na usimamizi mzuri wa miradi ya maendeleo unaofanywa na Halmashauri ya Manispaa ya Singida katika miradi yake yote.

Malata amesema, miradi ya maendeleo inayotekelezwa kupitia mapato ya ndani ya Manispaa ya Singida ni mfano wa kuigwa, na akaitaka Manispaa hiyo kupitia Kaimu Mkurugenzi  wake, Jeshi Lupembe na timu ya menejimenti, kuendelea kusimamia na kutekeleza Ilani ya Uchaguzi kwa kutekeleza miradi ya maendeleo na kuikamilisha kwa wakati ili wananchi waweze kunufaika nayo.

Akitoa taarifa kwa Kamati ya Siasa ya Mkoa wa Singida, inayokagua utekelezaji wa ilani ya Chama Cha Mapinduzi (CCM) mwaka 2020-2025, Mkuu wa idara ya kilimo na uvuvi, Dk. Adrianus Kalakezi amesema, tayari zimetengwa shilingi milioni 120 kupitia mapato ya ndani kwa mwaka wa fedha 2022/2023 kwa ajili ya ujenzi wa machinjio hiyo,  ambayo inatarajiwa kukamilika Mei mwaka huu.

Aidha wajumbe wa kamati ya siasa, wamepongeza kuanzishwa kwa mradi huo, huku Mkuu wa wilaya ya Singida Mhandisi Paskasi Muragili, akiwatoa hofu juu ya mikakati iliyopo katika mwendelezo wa ujenzi wa machinjio mpya ya kisasa kupitia Mradi wa kimkakati unaofadhiliwa wa Benki ya Dunia (TACTIC).

Manispaa ya Singida imeanza ujenzi wa machinjio ya kisasa, ili kuondokana na changamoto zilizopo katika machinjio ya zamani, zinazoathiri wakazi wa jirani na eneo hilo, kutokana na uchakavu wa miundombinu, hali inayosababisha harufu kali na hivyo kuleta usumbufu mkubwa kwa wakazi hao.

Machinjio ya zamani ilijengwa katika miaka 1950, na  kujikuta imezingirwa na makazi ya watu, kutokana na kukua kwa mji.