MANISPAA YA SINGIDA KUTATUA CHANGAMOTO KWA KATA YA UHAMAKA NA MANDEWA

Posted on: October 24th, 2022

MANISPAA YA SINGIDA KUTATUA CHANGAMOTO KWA KATA YA UHAMAKA NA MANDEWA

Watumishi katika Manispaa ya Singida wametakiwa kutumia nafasi zao vizuri ili kutatua changamoto zinazoikabili jamii, kwa ajili ya ustawi wa maendeleo ya wananchi wanaowatumikia.

Akizungumza kwenye kikao kazi, diwani wa kata ya Mandewa Baraka Alli, amesema kuwa, suala la maadili na mahusiano mazuri baina ya watumishi wa umma na Serikali ni muhimu, ili kuleta ufanisi katika kuitumikia jamii.

Kikao hicho kilichohudhuriwa na watumishi wa Manispaa, wakiwemo Watendaji wa Kata na Madiwani, kimejikita zaidi katika kuzungumzia changamoto zilizopo katika maeneo ya kazi na namna gani ya kuzitatua, kwa ustawi wa jamii husika.

Moja wapo ya matakwa ya Serikali kuu ni kuhahakisha miradi inayopelekwa kwa ajili ya ujenzi wa vyumba vya madarasa, inayogharimu pesa nyingi za umma, inasimamiwa ipasavyo  ili kuwaondolea wananchi adha.

 “Sisi kama viongozi wenu, naomba sana mtupe ushirikiano…tupo hapa kwa ajili ya kushirikiana na ninyi, ili mipango na harakati za kuleta maendeleo, zilete tija kwa jamii,”alisema Baraka.

Kwa upande wake, Diwani wa Kata ya Uhamaka, Senge Masidi,  ametoa rai kwa watumishi wa umma na wadau wengine wa maendeleo, kuhakikishha wanapiga vita vitendo vyote vinavyohusiana na kusababisha rushwa kazini.

“ Sisi tukiwa wala rushwa, basi kizazi chetu nacho kitajihusisha na tabia hiyo, jambo ambalo sio zuri...tufanye kazi kwa bidii na tujitoe zaidi, ili kufikia matarajio ya jamii tunayoiongoza,” alisema Senge

Afisa Utumishi wa Manispaa ya Singida, Kulanga Kayanga, aliwataka watumishi wa umma kuwahi kazini , kulingana na sheria, kanuni na taratibu za utumishi wa umma.

Amesema, kulingana na rejea katika kifungu cha katiba iliyoainisha juu ya sheria hiyo, amewataka kuwajibika ipasavyo, huku akiwaqsisitiza Watendaji wa Kata, kuhakikisha  Ofisi zao zinafunguliwa kwa wakati.

“Tufuate muongozo wa mavazi ya kiutumishi na sheria ya kuwahi kazini,..unatakiwa kutambua wajibu wako na kufanya kazi, kwa kuzingatia taratibu za utumishi wa umma,” alisema Kulanga.

Mmoja wa washiriki, akiwemo mtendaji wa Kata ya Uhamaka, Emaniel Qawoga, aliwaomba wazazi wa kata hiyo, kuhakikisha wanakuwa na uelewa wa kutosha, katika kuchangia shughuli za maendeleo, ikiwemo michango ya malipo walinzi.

Kwa mujibu Qawoga, posho ya walinzi, inatolewa kutoka ofisi za Serikali za vijiji kutokana na makusanyo ya ushuru kulingana na makubaliano na wazazi,…walimu himizeni wazazi walipe pesa za ulinzi, ambazo ni shilingi 1,000 tu kwa mwezi”, alisema Qawoga.

WATUMISHI wa Manispaa ya Singida, wakiwa na Walimu wa Shule za Msingi, madiwani na watendaji wa Kata za Mandewa na Uhamaka, wakiwa kwenye picha ya pamoja, baada ya kikao kazi.

DIWANI Kata ya Uhamaka, Baraka Ally, akiteta jambo na Afisa Utumishi wa Manispaa ya Singida, Kulanga Kayanga katika kikao kazi kuhusu miradi ya Serikali inayotekelezwa na Serikali katika Kata zao.

AFISA Utumishi wa Manispaa ya Singida Kulanga Kayanga, akimpatia Mwalimu Happiness Lyanga wa Shule ya Msingi, Manguanjuki, rejea ya kifungu kwa ajili ya kuwasomea watumishi, juu ya sheria ya utumishi wa umma, kuhusu muda wa kufika na kuondoka kazini.

AFISA Manunuzi wa Manispaa, Simon Haule, akiwaelekeza wakuu wa shule na vituo vingine, jinsi gani ya kutuma mrejesho wa fedha za miradi, katika kikao cha miradi ya Serikali inayotekelezwa katika Kata zao.

MTENDAJI wa Kata ya Uhamaka, Emaniel Qawoga, akifafanua jambo kwa watumishi wa Umma, katika Kata ya Uhamaka, kupitia kikao cha miradi ya Serikali inayotekelezwa katika Kata zao.