MANISPAA YA SINGIDA: UTEKELEZAJI WA ZOEZI LA CHANJO YA POLIO

Posted on: September 2nd, 2022

Manispaa ya Singida inatekeleza zoezi la kuwachanja chanjo ya polio watoto wenye umri chini ya miaka mitano wapatao 39,841 kwa asilimia 100 zoezi lililoanza tarehe 1/9/2022 na kutarajia kumalizika tarehe 4/9/2022. Walengwa ni watoto wote wenye umri kuanzia 0 hadi miezi 59 (chini ya miaka 5)

Akizungumzia chanjo hiyo Mratibu wa Chanjo wa Manispaa ya Singida Bi. Digna Salkaya amesema Kwa kawaida Chanjo ya polio hutolewa kwa awamu 4 kwa watoto chini ya mwaka 1 na kwamba li kudhibiti ugonjwa huu Serikali imependekeza kufanya kampeni ya kitaifa kwa kutimiza awamu 4.

“Kwa sasa tunatekeleza awamu ya III ili kuendeleza ukamilishaji wa chanjo ya Polio ambayo hutolewa kwa awamu 4 ili kuwafikia walengwa wote na kudhibiti ugonjwa huu wa kupoza” amesema Bi. Digna Sakaya

Amesema lengo kuu la chanjo hii ni kupambana na magonjwa yanayozuilika kwa chanjo, kupunguza vifo vya watoto chini miaka 5na kupunguza ulemavu wa kudumu.

Akizungumzia mwitikio wa wananchi katika kupelekea Watoto walio na umri chini ya miaka 05, Bi. Sakaya amesema mwitikio ni mkubwa sana na matarajio ni kuvuka lengo lililowekwa.

Mkuu wa wilaya ya Singida Mhandisi Paskasi Mulagiri ambaye pia ni Mwenyekiti wa Kamati ya Usalama ya Wilaya akipokea taarifa ya maandalizi ya chanjo ya polio pamoja na hali ya unadikishaji jamii katika Mfuko wa Afya ya jamii (iCHF), amesisitiza wataalamu kuhakikisha kila mwananchi asiye na bima kujiunga na Mfuko wa Afya ya Jamii (iCHF) ili kumwezesha kupata matibabu bila usumbufu.

Mhandisi Mulagiri ameagiza elimu ya kina kutolewa kwa wananchi ili kuwawezesha kujua huduma zitakazopatikana baada ya kujiunga na mfuko wa afya ya jamii.  Aidha amemetoa onyo kwa watoa huduma kubagua wagonjwa kutokana na aina ya bima waliyonayo.

“ ubaguzi kwa wagonjwa kutokana na kuwa na bima ya iCHF ukomeshwe”, amesisitiza Mulagiri