MANISPAA YA SINGIDA YAIMARISHA UNDUNGU NA USHIRIKIANO NA MANISPAA YA SULZBURG, AUSTRIA

Posted on: August 22nd, 2022

MANISPAA ya Singida imefufua undugu na ushirikiano katika masuala ya maendeleo, baina yake na nchi ya Ausria, kupitia mji wa Sulzburg, baada ya uhusiano wa pande hizo mbili kuwa kimya kwa kipindi cha miaka 8 iliyopita.

Akizungumza baada ya kutembelea maeneo yaliyotengwa kwa ajili ya uwekezaji na miradi iliyowahi kufadhiliwa na mji wa Sulzburg, chini ya Mfuko wa Maendeleo ya Jamii (CDTF), Mstahiki Meya wa Manispaa ya Singida Yagi Kiaratu, alisema uhusiano baina ya miji dada hii miwili yaani Manispaa ya Singida na Sulzburg una mengi ya kukumbukwa katika maendeleo ya wananchi wa Manispaa ya Singida hasa katika kumtua mama ndoo kichwani kwa kutoa fedha za kuboresha miundombinu ya Maji kupitia Mamlaka ya Maji safi na Usafi wa Mazingira Singida (SUWASA).

Mhe. Yagi alimshukuru mwakilishi wa Meya wa Sulzburg, Bi. Martina Berthold, kwa kuonyesha nia na utayari wa kuimarisha ushirikiano huu kwa mara nyingine na kusema kuwa utayari huu ni ishara njema na kwamba utaleta tija kwa wananchi wa manispaa zote mbili katika nyanja mbalimbali za kijamii.

Aidha, amesema kwa niaba ya wananchi wa Manispaa ya Singida anamshukuru Mstahiki Meya wa Manispaa ya Sulzburg, viongzozi na wananchi wote walioona umuhimu wa kuwanywesha maji safi na salama wananchi wa Singida ambao walikuwa wakikabiliwa na tatizo la maji kwa kipindi kirefu.

“Kwa kuimarisha urafiki na ushirikiano baina ya manispaa zetu kunaenda sambamba na milango aliyofungua Mhe. Rais wetu Mama Samia Suluhu Hassan ya ushirikiano baina ya nchi mbalimbali duniani” amesema Mhe. Yagi.

Akizungumza kwa niamba ya Mstahiki Meya wa Manispaa ya Sulzaburg Mhe. Martina Berthold alisema miji hii miwili inachangamoto ambazo kwa namna moja ama nyingine zinafanana ingawa uzoefu unatofautiana  hasa katika masuala ya kimazingira kutokana na mabadiliko ya tabia ya nchi, masuala ya kijamii na kiuchumi na kwamba anaamini kwa ushirikiano uliopo baadhi ya changamoto zitaweza kutatuliwa.

Mwakilishi huyo na timu ya wataalamu wakiwemo madiwani kutoka mji wa Salzburg, walifika katika Manispaa ya Singida, na kutembelea miradi mbalimbali iliyowahi kufadhiliwa na taifa hilo kipindi cha miaka ya 2012 na 2014 na kuahidi kuangallia uwezekano wa kuendelea kutoa ushirikiano katika kuboresha miradi hiyo.

Baadhi ya miradi iliyotembelewa ni mradi wa kuboresha huduma ya maji katika Manispaa ya Singida mwaka 1999, uliogharimu zaidi ya shilingi milioni 600 na ujenzi wa kituo cha polisi katika kituo kipya cha mabasi yaendayo mikoani. Miradi mingine iliyotembelewa ni pamoja na kituo cha afya Sokoine, Mradi wa udhibiti taka katika kizimba cha taka katika Kata ya majengo na  eneo la ujenzi wa kitegauchumi lililopo stendi ya Zamani pia katika Kata ya Majengo.

Kwa upande wake kaimu meneja ufundi wa Mamlaka Maji safi na Usafi wa Mazingira Singida (SUWASA), Mhandisi Richard Kasase, alieleza changamoto zinazoikabili SUWASA kuwa ni Pamoja na ongezeko la watu katika mji wa Singida, hali inayohitaji huduma zaidi ya maji  ikilinganishwa na uzalishaji wa maji uliopo kwa sasa.

Ushirikiano kati ya Manispaa ya Singida na mji wa Sulzburg, inayofahamika kama miji dada, ulianza mwaka 1984 na kuimarika hadi kufikia 2014 ambapo ulianza kufifia, hata hivyo chini ya Mstahiki Meya Yagi Kiaratu urafiki na ushirikiano  umerejea tena  kwa kushirikiana na asasi ya CIP-Trust, Singida.