MANISPAA YA SINGIDA YAJIPANGA KUDHIBITI MAGONJWA YA MLIPUKO

Posted on: November 9th, 2023

Katika kuhakikisha magonjwa ya mlipuko yanadhibitiwa, Manispaa ya Singida imeanza zoezi la kutoa elimu katika Kata 9 za mjini zenye mikusanyiko mikubwa ya watu ikiwa ni awamu ya kwanza.

Hayo yameelezwa Leo 9 Novemba, 2023 na Kaimu Mganga Mkuu wa Manispaa, Dr Peter Sasi, katika kikao cha pamoja baina ya watumishi wa Idara ya Afya na watendaji wa Kata zote 18 katika ukumbi wa Manispaa ya Singida.

Dr. Sasi amesema, Idara ya Afya imeshaandaa ratiba ya kutoa elimu Kwa wananchi kupitia makundi kazi (4) yanayohusisha wataalamu wa Idara ya Afya, watendaji wa Kata na walezi wa Kata.

"Makundi hayo yatapita katika Kaya, Taasisi na maeneo yenye mikusanyiko mikubwa ya watu" amebainisha Dr. Sasi.

Dr. Sasi ameendelea kufafanua kuwa kulingana na mpango kazi ulioandaliwa na Idara yake, zoezi la ukaguzi litafuata katika maeneo ya migahawa na hoteli Ili kuhakikisha panakuwapo na maji tiririka na vyombo vya kuweka uchafu katika eneo husika.

Aidha amesema ukaguzi Kama huo utafanyika pia katika Kaya Ili kuhakikisha uwepo wa vyoo na pia kuona endapo vinatumika Kwa usahihi pamoja na uwepo wa maji tiririka.

Washiriki wa kikao hicho wameomba elimu hiyo itolewe pia katika maeneo yote yenye magulio na minada Ili waweze kuchukuwa tahadhali juu ya magonjwa ya mlipuko.

Akiahirisha kikao hicho Kaimu Mkurugenzi wa Manispaa, Edward Mboya, amewataka watendaji wote kutoa ushirikiano Katika kuelimisha wananchi juu ya tahadhari dhidi ya magonjwa ya mlipuko lakini pia kutoa taarifa mapema juu ya uwepo wa viashiria vya mlipuko wa magonjwa hayo.