MANISPAA YA SINGIDA YAKABIDHI VYEREHANI KWA KIKUNDI CHA VIJANA

Posted on: December 30th, 2022

HALMASHAURI ya Manispaa ya Singida yakabidhi Vyerehani vitatu vilivyo ahidiwa na Waziri Mkuu wa Jamhuri ya Muungano wa Tanzania Mh. Kassim Majaliwa kwa kikundi cha vijana kiitwacho Chapakazi Art of Leather wakati wa ziara  yake mkoani Singida mwezi Julai.

Akikabidhi vyerehani hivyo, Mheshimiwa Mstahiki Meya wa Manispaa ya Singida Yagi Kiaratu amewasa wanakikundi kuwa na umoja na uvumilivu katika kufanya kazi ili kufikia malengo waliojiwekea na kupunguza vijana wanaozurura mtaani bila kufanya kazi na kuwa mzigo kwa jamii na serikali.

“Nawapongeza sana vijana kwa hatua nzuri mliyofikia na endeleeni kuchapa kazi kwa bidii ili kupunguza uzururaji mtaani bila kazi na kuwa na wimbi kubwa la vijana kutumia muda mwingi kucheza mchezo wa ‘pool table’ kuliko kufanya kazi zinazoleta manufaa kwa jamii na Taifa kwa ujumla”

Pia amewashauri kutumia fursa za mikopo itolewayo na taasisi mbalimbali za benki zinazotoa mikopo kwa riba nafuu kwa ajili ya kukuza biashara yao ili waweze kujikwamua kimaisha.

Mstahiki Meya amewataka kutumia vizuri mkopo waliopata kutoka mfuko wa asilimia kumi wa Manispaa ya Singida kwa manufaa ya biashara yao na kukumbuka kufanya marejesho kama inavyotakiwa.

Katika kujibu changamoto za kikundi hicho Mheshiwa Yagi Kiaratu amesema kuwa serikali itaendelea kutafuta soko kwa ajili ya biashara yao na wao wajitahidi kutafuta soko bila kutegemea serikali peke yake.

Katika kutatua changamoto ya ukosefu wa eneo la kudumu la biashara yao ambalo litakuwa rahisi kufuikiwa na wateja, Mstahiki Meya amesema kuwa kama wataendelea vizuri na biashara atawatafutia eneo la kudumu la kufanyaia biashara kabla ya kipindi cha uongozi wake kuisha.

 Kwa Niaba ya Kaimu Mkurugenzi wa Manispaa ya Singida, Afisa Utumishi na Utawala Kulanga Kanyanga, aliwaasa wanakikundi watunze vyereheni hivyo, ikitokea mmoja wao amehama wasiuze vyerehani hivyo kwa lengo la kugawana fedha na kuwaomba kuwa na umoja katika kuvitunza.

 Kikundi hicho ni miongoni mwa vikundi vya vijana vilivyopo katika Halmashauri ya Manispaa ya Singida, kata ya Majengo, mtaa wa Mwenge kinachojishughulisha na utengenezaji wa viatu vya Ngozi, pochi za kiume, mikanda na mikoba kilichoanzishwa oktoba 2021, kikiwa na wanachama 5.