MANISPAA YA SINGIDA YAKABIDHI VYUMBA 50 VYA MADARASA NA SAMANI

Posted on: December 23rd, 2022

Halmashauri ya Manispaa ya Singida leo tarehe 23 Desemba, 2022 imekabidhi vyumba 50 vya madarasa vikiwa na viti na meza 2500 kwa Mkuu wa Mkoa wa Singida Peter Serukamba aliyewakilishwa katika hafla hiyo ya makabidhiano, na Mkuu wa wilaya ya Singida Mhandis Paskasi Muragili.

Kwenye makabidhiano hayo imeelezwa kuwa kukamilika kwa vyumba hivyo, kutaondoa adha waliyokuwa wakipata wanafunzi kutokana na upungufu mkubwa wa madarasa na samani uliozikabili shule nyingi za Manispaa ya Singida.

Akisoma taarifa fupi ya utekelezaji wa ujenzi wa vyumba 50 vya madarasa ya wanafunzi wa kidato cha kwanza kwa mwaka 2023, Kaimu Afisa Elimu wa sekondari, Aminieli Mfinanga, amesema vyumba hivyo  vitapunguza changamoto ya uhaba wa vyumba vya madarasa ambapo mahitaji yalikuwa vyumba 114 huku mahitaji  viti na meza yalikuwa 3100 ambapo 2500 yamepatikana kupitia mradi huo.

Afisa elimu huyo amefafanua Zaidi kuwa uwepo wa vyumba hivyo vipya 50 kutaboresha mazingira ya kufundishia na kujifunzia, kuinua ufaulu wa wanafunzi Pamoja na kupunguza tatizo la utoro. Amezitaja faida zilizopatikana kuwa ni pamoja na

ajira ya muda kwa wananchi takribani 300 wakati wa utekelezaji wa mradi wa ujenzi.

Amesema mradi huo utawezesha kusajiliwa na kufungiliwa kwa shule mpya ya sekondari ya Manga ambayo ilipata fedha za ujenzi wa vyumba 04 vya madarasa na vyoo matundu 10 yakiwemo matundu 02 ya vyoo vya walimu. Shule ya sekondari Manga ilianza kujengwa kwa nguvu za wananchi vyumba 02 madarasa

Akizungumza na wananchi wakati wa makabidhiano ya vyumba hivyo 50 vya madarasa, Mkuu wa wilaya ya Singida Mhandisi Paskasi Muragili ambaye amemwakilisha Mkuu wa Mkoa wa Singida, Peter Serukamba, amepongeza kazi nzuri ya usimamizi wa mradi iliyofanywa kwa ushirikiano baina ya wananchi na wataalam iliyowezesha ukamilishaji wa mradi  kwa wakati na kwa ubora unaotakiwa.

“ Kwa namna ya pekee niwapongeze wananchi wote, wataalam na hasa wakuu wa shule waliotekeleza huu mradi kwa kazi nzuri ya usimamizi iliyokuwa shirikishi….mmeitendea haki fedha mliyopewa kwa kazi hii”, amesema Muragili na kuongeza kuwa kazi waliyofanya ni kuunga mkono jitihada za Mheshimiwa Rais Dkt. Samia Suluhu Hassan  ya kutatua changamoto  mbalimbali na hasa katika sekta ya  elimu.

Pamoja na pongezi hizo, Muragili amewataka wananchi na wataalam kushirikiana katika kutatua changamoto mbalimbali huku akisema kuwa Mheshimiwa Rais amedhamiria kutatua kero katika sekta ya elimu ambapo kwa mwaka 2023 mradi mkubwa wa uboreshaji miundombinu ya shule za msingi (BOOST) utatekelezwa nchi nzima.

“ niwasihi wananchi kujitolea nguvukazi  wakati wa utekelezaji wa miradi hii ili kuiwezesha manispaa kupata fedha zaidi kwa kuwa mradi huo hupewa fedha kulingana na matokeo ya utekelezaji”

Aidha Mhandisi Muragili amewaelekeza wakuu wa shule kuhakikisha wanapanda miti mingi katika maeneo ya shule ili kuhifadhi na kupendezesha mazingira. Agizo hili amelielekeza pia kwa wananchi wote kuhakikisha wanapanda miti isiyopungua 04 katika kaya zao na kusema kuwa miti hiyo inafaida nyingi kijamii na kimazingira.

Akihitimisha Halfa hiyo ya makabidhiano Mstahiki Meya wa Manispaa ya Singida, Yagi Maulid Kiaratu, aliishukuru serikali kwa kutatua changamoto za miundombinu ya elimu na kuwataka wananchi na hasa wanafunzi kuilinda na kuitunza kwa vizazi vya baadae.

Amesema Miradi hiyo ni matokeo ya jitihada za wananchi katika kuboresha elimu kwa kujenga vyumba vya madarasa kwa nguvu zao na Rais kutambua jitihada hizo na kuona umuhimu wa kuwatua wananchi mzigo mkubwa waliokuwa nao.

“Leo Rais wetu ameona jitihada za wananchi za kuinua elimu na ameamua kuwatua mzingo, tumuunge mkono kwa kushiriki moja kwa moja katika utekelezaji wa miradi hii” amesema Yagi

Jumla ya shule za sekondari 16 kati ya 19 za Manispaa ya Singida zimenufaika  na mpango wa ujenzi wa vyumba 50 vya madarasa uliyogharimu kiasi cha Shilingi Bilioni moja kutoka serikali kuu.