MANISPAA YA SINGIDA YAPUNGUZA DARAJA SIFURI KWA MATOKEO YA KIDATO CHA NNE 2022

Posted on: February 4th, 2023

Manispaa ya Singida imepunguza daraja sifuri kwa matokeo ya kidato cha nne na kulifuta kabisa daraja hilo,kwa baadhi ya shule za sekondari mwaka 2022, kutokana na mikakati iliyojiwekea katika kutokomeza daraja hilo.

Hayo yamebainishwa na afisa Elimu Taaluma wa Manispaa ya Singida, Joseph Ngoseki, ofisini kwake, wakati akitoa ufafanuzi wa hali ya matokeo ya kidato cha nne, kwa mwaka 2022.

Ngoseki amefafanua kwamba, kwa mwaka 2022, Manispaa ya Singida imefaulisha kwa asilimia 81, hivyo kupunguza kabisa daraja la sifuri (“0”), ikilinganishwa na ufaulu wa mwaka 2021.

Amesema matokeo hayo yameiwezesha Manispaa kuongoza katika Mkoa na Wilaya pia, kutokana na mikakati ya Idara ya Elimu Sekondari, ya kuhakikisha kiwango cha ufaulu kinaongezeka kadri iwezekanavyo.

Ameitaja mikakati hiyo kuwa ni, kuhakikisha Manispaa inafuta daraja la sifuri kwa kufanya Ufuatiliaji ili kupunguza utoro wa walimu na wanafunzi kwa kuweza kusimamia vyema mahudhurio yao darasani.

Mikakati mingine ni kuanzisha kitabu cha mahudhurio kwa walimu (class Journal), kwa kila mwalimu kutakiwa kusaini mahudhurio yake kila baada ya kumalizika kipindi.

Ngoseki, ameitaja mikakati mingine kuwa ni kukagua na kuhakikisha kila mwalimu anakuwa na azimio la kazi, andalio la somo na “class notes” kabla ya kuingia darasani na kufanya tathmini ya uelewa kwa wanafunzi wake pindi anapomaliza kipindi ili kubaini wale dhaifu, kwa ajili ya kupewa mafunzo ya ziada.

Mikakati mingine kwa mujibu wa Afisa Taaluma huyo ni kufanya kazi kwa karibu na Ofisi ya Mthibiti Ubora wa elimu, kuwatumia walimu mahiri ili kuwafundisha walimu wengine mada ambazo ni ngumu, kufundisha walimu namna bora ya kutunga mitihani na kutumia walimu waliotumika kusahihisha mitihani ya taifa, kwa ajili ya kufundisha namna bora za kujibu maswali.

 “Tumewaelekeza walimu Wakuu na walimu wa taaluma kuingia darasani ili kuhakikisha kile kilichofundishwa na walimu wa masomo husika, ndicho kimefundishwa?!”, amesema Ngoseki

Ngoseki amesema kuwa, pamoja na usimamizi wa karibu  kwa walimu na wanafunzi, Idara yake imejiwekea mkakati wa kila shule kufanya mazoezi ya darasani na mitihani ya majaribio kwa shule zote na pia Ki-wilaya mara kwa mara, ili kuinua taaluma.

“Mwaka jana shule yetu ya Unyianga ilikuwa ya mwisho kwa shule za Manispaa lakini pia katika ngazi ya mkoa ilikuwa ya nne kati ya shule tano za mwisho, lakini kupitia mazoezi na usimamizi wa karibu kwa walimu na wanafunzi mwaka 2022 imefanya vizuri”, amesema Afisa elimu Taaluma.

BOFYA HAPA KUTAZAMA  TATHMINI YA MATOKEO KI-SHULE