MANISPAA YA SINGIDA YATOA MIKOPO YA ZAIDI YA SHILINGI MILIONI 300

Posted on: February 17th, 2023

Halmashauri ya Manispaa ya Singida, yawawezesha wananchi wake kiuchumi kwa kutoa mikopo yenye thamani ya Tshs. 305,000,000, zinazotokana na asilimia kumi ya mapato ya ndani.

Akisoma taarifa ya hali ya ukopeshaji kwa Mkuu wa Idara ya Maendeleo ya Jamii  Manispaa ya Singida, Upendo Naftali, amesema  kwa mwaka wa fedha 2022/2023, kiasi cha Tshs. 420,000,000 kimetengwa kwa ajili wanawake, vijana na watu wenye ulemavu.

Mgeni Rasmi katika hafla ya kukabidhi hundi za mikopo kwa wanufaika, Mstahiki Meya wa Mnispaa ya Singida Yagi Maulid Kiaratu, amewataka walengwa kutumia vyema mikopo hiyo ili waweze kujikwamua kiuchumi.

Amesema kutokana ajira kuwa ngumu serikali imebuni utaratibu mbadala utakaowezesha wananchi kujiajiri kupitia  miradi mbalimbali watakayoibua kutokana na fursa zilizopo kwenye maeneo yao.

Aidha Mstahiki Meya, ameishauri Idara ya Maendeleo ya jamii kuelimisha jamii kuhusiana na fursa mbalimbali za kiuchumi zilizopo pia kuwaunganisha walengwa na taasisi mbalimbali za mikopo nafuu zikiwemo taasisi za kifedha.

Kwa upande wake Naibu Meya, Hassan Mkata, amewataka wanufaika hao kutoka katika vikundi 77, kuitumia mikopo hiyo kwa lengo lililokusudiwa badala ya kuelekeza katika starehe mbalimbali.

Naye Kaimu Mkurugenzi wa Manispaa ya Singida, Jeshi Lupembe, amewaeleza washiriki kuwa, Halmashauri itaendelea kutenga fedha asilimia 10 ya mapato ya ndani kwa ajili ya wanawake, Vijana na makundi maalumu kwani hilo ni takwa la kisheria.

Jumla ya vikundi 81 viliwasilisha maombi ya mkopo kupitia mfumo wa wizara ( TAMISEMI),  kati yake  77 vilikidhi vigezo na kufanikiwa kupata mikopo yenye thamani ya Tshs, 305,000,000.