MANISPAA YA SINGIDA YAZINDUA KAMPENI YA UPANDAJI MITI KUKABILIANA NA MABADILIKO YA TABIANCHI

Posted on: January 15th, 2024

Kampeni ya uhifadhi wa mazingira Kwa mwaka 2024, imezinduliwa Kwa kupanda miti zaidi ya 300 eneo la shule kongwe ya Msingi ya Kititimo katika Manispaa ya Singida.

Katibu Tawala wa Wilaya ya Singida, Naima Chondo, amezindua kampeni hiyo Januari 15, 2024 akiungana pamoja na wanafunzi na wananchi wa eneo linalozunguka Shule ya Msingi Kikitimo katika kata ya Mungumaji mjini hapa.

Kiongozi huyo aliongoza zoezi hilo la upandaji miti akiwa na viongozi mbalimbali akiwemo Kaimu Mkurugenzi wa Manispaa ya Singida, Edward Mboya, Diwani wa Kata ya Mungumaji, Mhe. Hassan Mkata, Maafisa Tarafa Wilaya ya Singida, Wakuu wa Idara na Vitengo, viongozi wa Chama na Dini mbalimbali, wanafunzi na wananchi wa eneo la Kititimo.

Lengo la Serikali ni kuona mazingira yanatunzwa Ili kukabiliana na mabadiliko ya tabianchi ambapo kila wilaya nchini inatekeleza lengo hilo Kwa kupanda jumla ya miti milioni 1.5 katika maeneo mbalimbali yakiwemo makazi ya watu, taasisi za umma na binafsi, maeneo ya wazi na pembezoni mwa Barabara.

Kiongozi huyo alisema , kutokana na tabia ya wananchi wa mkoa wa singida ya kukata miti ovyo, kuchoma moto misitu na kuaribu mazingira Kwa namna mbalimbali, mkoa huu umegeuka na kuwa na mazingira ya jangwa hali inayosababisha mabadiliko ya tabianchi Kwa kubadilika Kwa majira / Vipindi vya Hali ya hewa ambavyo huleta mabadiliko ya Vipindi vya mvua na hivyo kuathiri misimu ya kilimo.

Aidha Chondo aliushukuru uongozi wa Shule ya Msingi Kititimo kwa kutoa nafasi ya kuzindua kampeni ya upandaji wa miti katika eneo hilo ambapo miti 300 ya aina tofauti ikiwemo ya matunda, mbao na ile ya vivuli imeweza kupandwa huku akisistiza suala Zima la utunzaji wa miti hiyo Kwa walimu na wanafunzi wa shule ya Kititimo.

Licha ya upandaji huo wa miti, Chondo ametoa msisitizo pia katika suala la usafi wa mazingira na kutaka kupewa kipaumbele Cha kwanza katika shule hiyo pamoja na maeneo yote ya Manispaa ya Singida ilikuepuka magonjwa ya mlipuko.

Zoezi la upandaji miti ni endelevu hasa katika kipindi hiki Cha mvua.