MAPATO YA NDANI KUINUFAISHA KATA YA MTIPA

Posted on: November 15th, 2022

Kamati ya Maendeleo Kata ya Mtipa (WDC) Manispaa ya Singida, imetakiwa kufuata taratibu, kanuni na sheria za nchi, katika kuunda kamati ndogo ya ujenzi wa kituo cha Afya, kinachojengwa kwa kutumia Mapato ya ndani.

Hayo yameelezwa na Kaimu Mkurugenzi wa Manispaa ya Singida Jeshi Lupembe katika kikao chake na wajumbe wa kamati hiyo ikiwa ni sehemu ya maandalizi ya utekelezaji wa mradi huo utakaogharimu kiasi cha Tshs. 500,000,000/-.

“Mmepata heshima kubwa kuletewa mradi huu na ni matumaini yangu kwamba mtafuata taratibu zote za kanuni taratibu na sheria za uundaji wa kamati ya kusimamia ujenzi…..chagueni wajumbe makini watakaosimia kwa ufanisi na kwa kiwango cha hali ya juu,” amesema Jeshi.

Jeshi amesema kutokana na kukua kwa kasi kwa shughuli za maendeleo katika Kata hiyo kuna kila sababu ya kujenga kituo cha afya ili kiweze kuhudumia wananchi kwa mapana zaidi.

Naye Mkuu wa kitengo cha Ugavi Manispaa, Simon Haule, akitoa maelekezo kwa wajumbe hao wa WDC kulingana na mwongozo wa ‘Force Account’ amesema, umakini unapaswa kuzingatiwa wakati wa kuteua wajumbe wa kamati tatu za kusimaia ujenzi wa kituo hicho cha afya ili kuepuka kuyumbisha mradi.

“kamati za ujenzi zina umuhimu sana katika kusimamia ujenzi na kuuwezesha kukamilika katika ubora na thamani halisi ya fedha …..hizi kamati tatu zikikosa umakini mradi huu utayumba” amesema Haule.

Halmashauri ya manispaa ya Singida imetenga kiasi cha Sh. 500,000,000/- katika bajeti yake ya 2022/2023 ya makusanyo ya ndani kwa ajili wa ujenzi wa kituo cha Afya. Aidha Wananchi wa kata ya mtipa wametoa eneo lenye ukubwa wa ekari 5.4 na tayari wananchi 4 waliotoa eneo wameshalipwa fidia ya Sh.5,830,430/-