MARUFUKU KUTUMIA ZANA HARAMU KWA SHUGHULI ZA UVUVI KWENYE ZIWA KINDAI NA SINGIDANI, YALIYOPO KATIKA MANISPAA YA SINGIDA

Posted on: August 2nd, 2023

MKUU wa Wilaya ya Singida, Mhandisi Paskasi Muragiri, amepiga marufuku shughuli za uvuvi haramu unaotumia nyavu zisizokuwa na kiwango, kwenye ziwa Kindai na Singidani, yaliyopo katika Manispaa ya Singida, na kuonya kuwa wote watakaobaniska, watakamatwa na watafikishwa mahakamani.

Mhandisi Muragiri alitoa onyo hilo, wakati akipokea taarifa ya zoezi la  uteketezaji wa nyavu haramu, zilizotumika kwenye shughuli za uvuvi katika ziwa Kindai na Singidani, kipindi cha mwaka wa fedha Julai 2022 hadi juni 2023.

Amesema , maziwa hayo ni muhimu katika kuoingezea pato Manispaa, kutokana na shughuli za uvuvi, pamoja na  kuwaingizia wananchi kipato cha kutosha katika kumudu maisha ya familia zao lakini pia lishe kutokana na samaki wanaovuliwa.

“ natoa agizo wavuvi kusitisha matumizi ya zana haramu katika shughuli za uvuvi na wananchi wasisite kuwaripoti wale wanaoendeleza hujuma kwenye maziwa haya ili wafikishwe kwenye  vyombo vya sheria wafunguliwe mashitaka, badala ya kuteketeza tu zana zao pekee,”alisema.

Kutokana na uvuvi huo usiozingatia taratibu, Mkuu huyo wa wilaya amebainisha kuwa kuna hatari ya kuua kizazi cha samaki na kuvua vifaranga, jambo linatishia uwepo wa samaki kwenye mziwa hayo.

“Samaki ni muhimu kwa ajili ya lishe bora inayoshauriwa na wataalamu wa afya, hivyo ni jukumu letu wote kuanzia walaji, wajasiriamali hadi wavuvi kuhakikisha tunalinda kitoweo hiki kisitoweke,”amesisitiza.

Awali akitoa taarifa ya zoezi hilo, Mkuu wa idara ya Kilimo na Mifugo, Dk. Kalekezi, amesema kwa kipindi hicho, Manispaa ya Singida, iliendesha oparesheni mbalimbali za uvuvi katika mamlaka yake, ikiwemo maziwa ya Kindai na Singidani.

Alisema oparesheni hizo, zililenga kukamata zana haramu zinazotumika kwenye uvuvi, kutoa elimu juu ya uharibifu unaosababishwa na wavuvi, hasa matumizi ya zana za uvuvi zilizopigwa marufuku na serikali.

Kwa mujibu wa Dk. Kalekezi, oparesheni hizo zililenga kukamata zana haramu ili kuziteketeza, na lilifanikiwa kwa kukamata nyavu haramu zenye thamani ya zaidi ya Tsh. Milioni 7.2/-, zikiwemo Kokoro 06, nyavu za matundu madogo 25 na nyavu aina ya Monofilament 17.

Kuhusu utoaji elimu, Dk. Kalekezi amesema, kipindi hicho wameweza kufanya mikutano 25 kwenye mialo mbalimbali kuwaelimisha wavuvi na wananchi juu ya madhara ya uvuvi haramu, utumiaji wa vifaa vya kujikinga na majanga majini, utunzaji wa mazingira kwenye mialo na kuhimiza ukataji leseni za uvuvi.

Dk.Kalekezi amesema pia kwa kipindi hicho, mafanikio mkubwa yamepatikana ikiwemo kilo 3,227 za samaki kuvuliwa katika kipindi cha Julai 2022 hadi Juni 2023 zenye thamani ya Tsh. 16,135,000/=, katika maziwa hayo mawili.

Amesema kiasi kingine cha Tsh.14,300,000/= kilikusanywa na Manispaa, zikiwa ni tozo za leseni na ushuru wa samaki katika masoko mbalimbali ya Manispaa ya Singida, kwa kipindi hicho.