MEYA MANISPAA YA SINGIDA AWAPONGEZA WANAFUNZI WALIOSHIRIKI MASHINDANO YA WANASAYANSI CHIPUKIZI KITAIFA

Posted on: February 7th, 2024

MSTAHIKI Meya wa Manispaa ya Singida, Yagi Kiaratu amewapongeza na kuwapatia vyeti wanafunzi wa shule tofauti za Manispaa ya Singida walioshiriki katika Mashindano ya Wanasayansi Chipukizi Tanzania na kufika ngazi ya taifa.

Wanafunzi hao wamepewa vyeti hivyo vya pongezi katika MKutano wa Baraza la Madiwani la Robo ya Pili ya mwaka wa fedha 2023/24 ambalo limefanyika leo Februari 07,2024 katika Ukumbi wa Maktaba ya Mwenge Sekondari.

Sambamba na hilo Idara ya Elimu Sekondari imeliomba Baraza la Madiwani kutambua mchango na uwakilishi wa wanafunzi wa shule za Manispaa katika mashindano hayo kupitia taarifa ya ushiriki wa shule kwenye mashindano ya wanasayansi chipukizi Tanzania iliyowasilishwa mbele ya baraza hilo.

Katika mashindano hayo kwa mwaka 2023, shule 11 kutoka Manispaa ya Singida zilifanikiwa kushiriki.

Kulingana na taarifa hiyo jumla ya wanafunzi 400 kutoka Mkoa wa Singida walishiriki na kufanikiwa kuibua wabunifu 40.

Wanafunzi 04 kutoka Manispaa ya Singida walifanikiwa kufika hatua ya juu ambao walitoka katika Shule za Sekondari Mitunduruni na Mwenge. Wanafunzi hao ni Kelvin Richard na Ally Almas ( Mitunduruni) na Kulwa Mahona na Emmanuel Masanja (Mwenge).

Kwa heshima na mchango wao Manispaa ya Singida kupitia Idara ya Elimu Sekondari imewapatia vyeti wanafaunzi 4 pamoja na walimu walezi ambao ni walimu wa wanasayansi chipukizi 11 wa shule tofauti Manispaa ya Singida.