MIRADI YA TACTIC YAANZA KUTEKELEZWA MANISPAA YA SINGIDA

Posted on: January 16th, 2024

Mradi wa uendelezaji Miji (TACTIC) kupitia ufadhili wa  Benki ya Dunia umeanza kutekelezwa katika Manispaa ya singida ambapo jumla ya miradi mitatu itatekelezwa na tayari washauri elekezi wa  mradi ambao ni  Hong – IK ya Korea, G and Y ya Ethiopia na Gauge Pro ya Tanzania wameanza kazi za awali.

Manispaa ya singida inatarajia kutekeleza miradi mitatu (03) ambayo ni ujenzi wa soko la kisasa la vitunguu kata ya Misuna, ujenzi wa barabara zenye urefu wa km. 7 Katika kata za Utemini na Mandewa na ujenzi wa mfereji wa maji ya mvua (Standalone storm water drain) eneo la Mnung’una kata ya Minga.

Akiwapokea Washauri elekezi hao wa mradi, Mstahiki Meya wa Manispaa ya Singida Yagi Maulid Kiaratu, amesema Manispaa ya Singida imepokea Mradi huo kwa furaha kutokana na uhitaji uliopo na kuwahakikishia watalaam hao ushirikiano wa kutosha kupitia timu ya wataalamu wa Manispaa iliyoteuliwa kusimamia utekelezaji wa mradi huo.

Amewatoa hofu watalaam hao na kusema Manispaa ya Singida ni sehemu salama hivyo wajisikie huru wakati wote wa utekelezaji wa shughuli zao.

Washauri elekezi wa Mradi wa TACTIC katika Manispaa ya Singida wanatarajiwa kutekeleza majukumu yao katika kipindi cha miezi sita ili fedha zeweze kutolewa tayari kwa utekelezaji wa Mradi.