MKURUGENZI WA MANISPAA AONGOZA MAADHIMISHO YA SIKU YA WAUGUZI MKOA WA SINGIDA

Posted on: May 30th, 2025

Mkurugenzi wa Halmashauri ya Manispaa ya Singida, Bi Joanfaith Kataraia, ameongoza maadhimisho ya Siku ya Wauguzi Mkoa wa Singida yaliyofanyika leo,Mei 30, 2025 huku akitoa wito kwa wauguzi Serikali inatambua mchango wao na akiwaasa kuendelea kuwa waaminifu na kutunza siri za wagonjwa.

Akizungumza katika hafla hiyo iliyofanyika katika Hospitali ya Manispaa ya Singida, Bi Kataraia amesema kuwa Serikali inatambua na kuthamini mchango mkubwa wa wauguzi katika kutoa huduma za afya kwa wananchi, na ndiyo sababu wamepewa nafasi ya kipekee ndani ya mfumo wa afya nchini.

“Serikali inatambua kwa dhati mchango wa wauguzi katika sekta ya afya. Nawaomba muendelee kufanya kazi kwa moyo mmoja, kumtumaini Mungu na kuzingatia maadili ya kazi yenu, hususan kutunza siri za wagonjwa,” alisema Bi Katarai.

Maadhimisho hayo ambayo hufanyika kila mwaka, yamewaleta pamoja wauguzi kutoka maeneo mbalimbali ya Mkoa wa Singida kwa ajili ya kutafakari, kujifunza na kuhamasishana katika kuboresha huduma wanazotoa kwa wananchi.