MKUU WA MKOA WA SINGIDA ATEMBELEA MASOKO KUONA HALI YA MIUNDOMBINU KATIKA MASOKO HAYO

Posted on: March 2nd, 2022

Mkuu wa Mkoa wa Singida Dr. Binirith Mahenge amemwagiza Mkugerugenzi wa Manispaa ya Singida kuweka Mazingira bora yenye huduma zote za kijamii katika soko la Mahembe ili kuwezesha Wafanyabiashara walio katika soko lilsilo rasmi la Kilambida kuhamia katika soko hilo mapema iwezekanavyo.

Mkuu wa Mkoa ambaye aliambatana na wajumbe wa Kamati ya ulinzi na Usalama Mkoa alisema miundombinu inayopaswa kuboreshwa ni pamoja na barabara na kizimba cha taka kwani mazingira yaliyopo  sasa hayaridhishi.

“ hakikisha mnafikia makubaliano mazuri ya kulipa fidia ili makaburi yaliyopo yaweze kuhamishwa wakati huo huo mnaendelea na taratibu za kuboresha mazingira ili Wafanyabiashara waweze kuhamia katika soko hili”

Awali kabla ya kutembelea soko la Mahembe Mkuu wa Mkoa alitembelea soko lisilo rasmi la Kilambida na kupata maelezo kutoka kwa Afisa Maendeleo ya Jamii Tumaini Nsabi ambaye ni kiongozi wa timu ya kuratibu wafanyabiashara wadogo katika maeneo rasmi kwamba   utaratibu wa kuwahamisha wafanyabishara katika soko la kilambida unaendelea kushughulikiwa na pindi utakapokamilika watahamishwa.

 Naye Mkuu wa wilaya singida Mhandisi Paskasi Muragili  ambae ni Mwenyekiti wa Kamati ya kuhamisha Wafanyabiashara wadogo katika maeneo rasmi akifafanua zaidi alisema zoezi la kuwahamisha wafanyabiashara katika soko la kilambida liko palepale na kwamba miundombinu muhimu itakapokamilika katika soko la Mahembe pamoja na ulipaji fidia  kwa ajili ya kuhamisha makaburi yaliyopo katika eneo hilo ukikamilika zoezi la uhamishaji utaendelea.

Alisema kuendelea kuwaacha katika maeneo hayo kutahatarisha afya za Jamii inayozunguka soko kwa kuwa taka zinatapakaa na kutiririsha maji machafu ambayo yanaweza kusababisha magonjwa ya mlipuko.

Pamoja na soko la kilambida Mkuu wa Mkoa na wajumbe wa Kamati ya Usalama ya Mkoa pia walitembelea soko la Unyankindi ambapo alipongeza mwitikio mzuri wa wafanyabiashara wa kuhamia katika soko hilo na kwa namna walivyojipanga.

“ nawapongeza sana kwa mwitikio mzuri wa kuhamia katika soko hili na jinsi mlivyojipanga kufanya biashara zenu, nitahakikisha barabara zinaboreshwa ili magari yaweze kuingia na kushusha mizigo” alisisitiza Mkuu wa Mkoa